Ynne ka sngi man ko ka sngi wa 14 yong ka Lockdown wa 21 sngi ha waroh ka ri wow yakhun pyrchah ya ka khlam u COVID-19.
Heiyatoh wa kani ka yakhun ki bor District da pynkrehkaam ki ya ka Curfew kam wow pynskem wa krehkaam kani ka Lockdown.
Chooh chooh wot hadien wa em ka Curfew sa ki dorbar chnong leh da chimkhia ki wow khang yei mih i lai hapoh ki pood ki chnong wa em hapoh ka ri-loom Jaiñtia heiwa da booh ki ya ki kattu katni ki kyndon wow pynlait ya kiwa emkaam kam ha kini ki por.
Hawa uiñ ha talawiar ka ri-loom Jaiñtia ha kini ki sngi wa dadep da sakhi wa ki sarok wow psiah chapoh ki chnong da man ki kiwa khang wei da em leh ki bru wa yieñ (Volunteer) wow pynkrehkaam ya ki hukum wa ki rai ki chnong.
Heiyatoh wa ini i jooh, ki bor sorkar da kyruiñ ki cha ki bor ki Dorbar Chnong wow pynkhlan ya i yakhun pyrchah ya kani ka khlam.
Discussion about this post