Ka seiñ JSU da pteiñ ko ya i kynreh kot ya ki baar jylla kiwa wan sah wan kreh hapoh Ri-loom Jaiñtia deiwa kyrpaad leh ya ki Dorbar Chnong wow dam noh u e NOC ya ki (baar jylla) neibhah wa ktah ko ya i khayi pateiñ ki tre jylla.
Ha kini ki sngi wa dadep ka seiñ kam ka dak wow pyrchah yei wym mano ka sorkar wow e ya ka ILP da sdang ko ya i yakhih dawa ILP biang.
Ha ini i lai kynreh kot ka JSU ya ki baar jylla da pyntip ko leh cha ka JHADC wei ka Council dang boohteiñ ko wow leh yeiwa emkaam neiliang yong ka hajrong ini.
Hajrong ini waroh neiliang ka JSU Syndai Unit hapoh i yahkhmat u President ka JSU Syndai Unit, u Pynshailang Suliang wa u Vice President u Bankerlang Lamurong wa kiwi kiwi heipor wa kynreh ya ki kot ko sla ki baar jylla wa kiwa wan kreh hei pyrtuid ka Company Airtel hapoh ka chnong Syndai Mission da chem wa waroh kiwa wan kreh biang ki ya ki kot ki sla wei ka seiñ da phah ko ya ki wow liwan ki mar dep i kaam yong ki wow chna ya u Tower.
