Wot hawa ki paidbah ka chnong Sohmynting da dep maad ki yei chah yoohroit i hok hajrong ka Scheme chna Paiñkhana 2015-16 kaw wan lyngba ka chnat Public Health Engineering RWS Division, West Jaiñtia Hills, Jowai, kawa ki paidbah dang yoo luti ki yei hok hadooh katni, tangwa kattæ da chem wa da mih biang i kynrum kynram sa haka Scheme wa thymme wa tip kam ka No One Left Behind (NOLB) kawa na katai hi ka chnat sorkar kawa da pynkreh ya kani.
Ha kani ka Scheme wa katni da chem wa ki bru wa mih pyrtuid kam kiwa yoh myntoi da mih lang i pyrtuid wa ki warim kiwa da dep wow yoh myntoi. Haka Scheme yong u snem 2015-16 katkam ka RTI kiwa yoh myntoi toh 381 ki manyung, ha kani kawa thymme won 88 tylli ki manyung wei ym duna 30 ngut toh kiwa da mih purtuid leh haka Scheme warim.
Hei yachem waka sahep yong ka PHE da ong ko wa lada toh i jooh i ki dak i pyrtuid namo i Spelling, ka kor namo ka System wa pait ya ini ym pdiang de ko, tangwa da chem won wa em hi ki jooh ki Spelling leh wa mih biang i pyrtuid ki, najrong wa em ki pyrtuid wa pynkylla du uwi u dak katwa haka Epic No/ Job Card No, toh ki jooh hi ki bru wada em pyrtuid haka Scheme paikhana warim, em won ki bynta haka Scheme warim mih i purtuid u kurim ha kawa thymme won dei pyrtuid ka kurim kiwa toh na i jooh ka manyung.
Neitæ hawa bichar yaka RTI wa i pynbna paidbah u Secretary VWSC wa katni u Mynjurlang Lyngdoh yei pyrtuid kiwa yoh myntoi na kani ka Scheme thymme haka dorbar wada man haka 15-12-2020 da chem wa em ki pyrtuid wa mih haka RTI wa da dep yoh ya katai ka Scheme da pynbna biang yei pyrtuid yong ki hapoh ka dorbar iwa ym sñiawthooh de kiwa chong chnong iyi mut u.
Hei yong sakhiat hi hachwa wow pynkrehkaam yaka Scheme wa thymme kam ka yung krehkaam PHE kawa da chem lut yei sakhiat hajrong i wym yoh kiwa chong chnong yei hok, toh u pynbait chwa ki yeini, tangwa phylla hawa wot yei warim wym pu dep e lut cha ki paidbah da wanrah kulmar biang ko sa ha kani kawa thymme. Iwa yoo wyrai dooh toh kitu wa mih pyrtuid hei warim hadooh katni leh dang lai paikhana taroi ki.
Lada heini i rukom ka thong yong kani ka Scheme paikhana neibynta u wanrah yei chait i khiah wei kamjooh wym toh u chah ieh mylliñ kawi wot ka manyung næ “No one left behind” wym em yahap ko.
Kam wow pynkynmoo ya iwa da dep, i lai luti hajrong i chah baam-tooh daki phaw lak ka Scheme paikhana 2015-16, wei hadien i phla hok wa markhmat ki paidbah haka kynhun takit ka chnat Public Health Engineering RWS Division, West Jaiñtia Hills, Jowai kawa da wan hiar ha chnong Sohmynting haka 3 waka 4 tarik Naikhynde 2020, neiliang kiwa yoh myntoi wa mih pyrtuid haka RTI da phah ki yaka chithi dawa yei hok yong ki cha ka ka PHE haka 05-11-2020, wei yei jubab da yoh ki naka haka 16-11-2020 kawa pyntip wa da dep pynlait lut ko yaka poisa cha ka VWSC wei ong ko leh yaki paidbah u lai dawa ki naka VWSC, heijooh i por neiliang ka PHE da hukum haroh ko yaka VWSC lyngba ka chithi No.DSBM(G)/WJHD/FIR-C Against VWSC//2015-16/605II wa toh u su næ pynyoh ko yei hok ki paidbah.
Sñiawphylla won manda ki paidbah lai dawa ki yei hok yong ki naka VWSC kamwa phah daka chnat PHE, u Mynjurlang Lyngdoh uwa man kam u Chairman ha katai ka Scheme 2015-16 wei man won u kam u Secretary VWSC katni da e Notice won u cha kiwa dawa wow lai yachem ki wa kiwa yahkhmat ka chnong haka 11-12-2020 ym cha ka VWSC (2015-16).
Wei napyrdi kiwa lai yachem da maham wei pynteiñ pynsmied pathan u ki hei rukom waphær waphær, wei ong leh wa ya kam kini kiwa lai ujor cha ka PHE wym e Scheme de, em leh napyrdi ki paidbah hawa yaklam ki wa oo phah lai paan pathan u na uwa paan RTI.
Hadien wa kiwa dawa yei hok da phah ki leh yaka chithi dawa cha ki dkhot katai ka Committee, em napyrdi kiwa man dkhot da pyntip ki chaka PHE wa ki wym em u tip ki wa man dkhot ki haka VWSC 2015-16. Da kyntait ki mardor wa embynta ki heiyatoh wa i pynkreh ya katai ka Scheme wei ong ki leh da em wa soi thok yei pyrtuid yong ki.
Hajrong kini kiyi kiyi waroh, neiliang uwa paan RTI uwa man leh uwi napyrdi kiwa chah soi thok i pyrtuid wa da man u kam u dkhot haka VWSC 2015-16, ong u wa daw lai u chakhmat heiyatoh wa ini hadooh wa chem yei sakhiat.
Da kylli haroh u wa neiyi i daw kam ki bor wa toh u pait neibynta i bha i miat wei i myntoi ki paidbah wot hawa da chem ki phlet yei sakhiat heipor wa wan hiar takit leh wym em leh ki iyi iyi hadooh katni.
Kani toh ka khubor wada pynlait da u Dapoi Pyrtuh, Sohmynting Village, West Jaiñtia Hills District, uwa man leh kam uwa paan RTI.
