Ar snem nadooh wa chah siat kiwa chong chnong ka Mukroh, West Jaiñtia Hills District ha kiwa yang khloo ka Assam, kiwa chong chnong da yakhih ki wow pyrchah ya ki kaam thombor wa da pynbaad wa da leh da ki heh ka Karbi Anglong Autonomous Council (KAAC).
U Precious Sten, Secretary ka Dorbar Chnong Mukroh da ong u wa hapoh u Wish (Mar) 2024, ka KAAC da sdang ko wow pam dieñ neibynta wow chna sarok ha Salang, Mukroh da i thmu wow sdang ya i thaw thung dieñ.
Da pynbaad leh wa ki bor pulit kamjooh kiwa kreh sarok da pyndik ki ya kiwa chong chnong ka Mukroh kiwa lai cha khloo wow thooh dieñ wei wow pynemkaam u thang wow chet kamwa da leh nadooh ki por nachwa.
Chooh chooh da ong u wa katni kiwa chong chnong da syir ki wow lai thooh dieñ na khloo yong ka chnong neidaw i wan psiah tooh ka KAAC dang ini wadep, heiwa ka KAAC da khang pyrchah ko ya kiwa chong chnong wow leh ki yeini deiwa kam wa i khloo ka Mukroh toh i yong ka.
U Precious da ong u leh wa i leh ka Assam wow wan cha Mukroh wei wow pam dieñ wow chna sarok toh wow kam pood yabor wei wa ka Dorbar Chnong Mukroh da pyntip ko cha ki bor sorkar ka West Jaiñtia Hills heiyatoh wa ini.
Ka Dorbar Chnong da kyrpaad ko leh ya ka sorkar jylla wow pynbiang ya ki bor yada waroh 24 kynta wow khanglaad ya kiwon kiwon ki kaam pyrchah aiñ kiwa da lai chaphrang wow pyntikna wa neh i bor ka aiñ.
Ha ka 29 tarik u bnai wa dep, ka Dorbar Chnong Mukroh da yachem ko ya u Symbood Montri Rangbah ka jylla, u Prestone Tynsong wa u Sniawbhalang Dhar uwa man leh u Chairman ka Regional Committee ka West Jaiñtia Hills District wow dawa phah sangeh ya i chna sarok wa ki kaam thung dieñ ka KAAC kiwa dang lai chakhmat ha Salang, Mukroh.
Discussion about this post