Neiliang yong ka Dorbar Chnong Ialong ha ka 5 tarik uni u bnai dap ko dei kmen wei sñiawngooh ya u MLA yong ka 2-Jowai Constituency, u Wailadmiki Shylla yei yarap yong oo cha waroh ki Dong wa em hapoh ka chnong Ialong, cha ka Seiñ Raij Ialong kamjooh cha ka Dorbar Chnong Ialong hi waroh kawi deiwa e kti ya 8 tylli ki Work Order kiwa da kynjoh cha T. 30 lak deilang wa ki Scheme samen cha ki khon yong ka chnong hei dur ki tiar kreh mistri.
Ka chnong da sñiawkmen chooh chooh ko leh wow ong wa ynnin ka 7 tarik da wan wai pyrda ya ka skur yong ka Dorbar Chnong Ialong, ka Ialong Secondary School, Ialong da u montri ka chnat Tourism, u Sniawbhalang Dhar kam u kongsan katwa u MLA ka thaaiñ, u Wailadmiki Shylla da man u kam u symbood kongsan hei emlang u Nominated MDC yong ka JHADC, u Octomewot Lamin.
Da pynphooh pynphieñ ya ka sngi wai pyrda yong kani ka skur deiwa emlang kiwa seiñ ya ka skur, ki dkhot chnong, ki dkhot yong ka SMC, ka Village Organization Ialong, ka Ialong Village Defense Party khamtam hei emlang ki tre thaw wa yahkhmat da ka Hunmon Dhar, ki khon ki ksu wa ki kur ki jait ki yong ka deiwa sakhi ya kani ka yalang da ki spah ngut ki khon yong ka chnong Ialong.
Ya kani ka yalang da pynlai da u Asst. Waheh Chnong, u Juhhi Pale, ki kyntien pdiang burom da yoh na u Feeling Mulieh, ki kyntien pynchlur heiyatoh wa i eh hei puræ puthi da e ka Secretary SMC, ka Neiniroibok Shylla kawa man leh kam ka Headmistress yong kani ka skur, ki kyntien pynap pynsñiaw heiyatoh wa ka rukom lai luti yong kani ka skur kamwa 38 tylli ki snem iwa mut nadooh u snem 1985 da e na uwi na ki dkhot wa seiñ namo u Founding Member yong kani ka skur u Maham Sing Lhuid, da yoh leh ya ki kyntien sñiawkmen neiliang yong ka yung kawa da e sñiawbha yei thaw yow chna ya kani ka skur neibynta wow kyntu kynrong yei stat i tip hapoh ka chnong ka thaw waroh kawi, da ong leh wa neiliang yong ka yung yooluti ki wow mih kiwa stat, ki sahep ki wabu na kani ka skur ha ki pateiñ wa daw wan, da pteiñ yei klam na u Waheh Chnong yong ka Dorbar Chnong Ialong, u T. Ram Phawa heiyatoh wa chiboon ki duna wa i eh ha kani ka skur ha waroh ki liang, dang duna leh nadooh ki yarap na ka sorkar heiyatoh wa ki Grant In Aid, kiwa sikai Deficit, ka Extension Building, u ker soodong ya ka skur, ka madan yalehke wa kiwi tawan ki emkaam.
Da yoh leh i klam na u symbood kongsan, u Wailadmiki Shylla uwa da ong wa ki skur man ki kiwa hakhmat namo ka Top Priority kiwa man kamjooh u budloom yong ka imlang sahlang ha ka juk wa katni, deiwa noh yarap u leh kamwa T. 5 lak neibynta wow chna ya ka Extension Building ka skur.
Hachwa wow pynwai ya ka lehkmen da yoh yei klam na u kongsan, u Sniawbhalang Dhar uwa da e ya ki kyntien kyrkhu kyrdoh ya ka chnong ka thaw khamtam ya ka skur chnong wada wai pyrda pynemburom ya ka hadien ki 38 tylli ki snem, wei da pynbna u leh yei yarap wow ker ya ka skur kamjooh wow siang madan skur dei khyndaw bilat.
Ha chwa wow pynwai ya ka yalang da yoh ya ki kyntien e khublei na u General Secretary yong ka Dorbar Chnong Ialong, u Masan War.
