Jowai: Ka All Jaiñtia Muster Roll Workers & Labour Union waka All Jaiñtia Mid Day Meal Workers Union, (CEC) Jowai hapoh i yahkhmat u K.L. Pariat u President ka seiñ, deilang wa i ya krehlang u A. Phawa President ka Seiñ Raij Mihmyntdu wa u Abul Phawa u Waheh Chnong ka Dorbar Chnong Mihmyntdu wa ki wakreh Muster Roll wa ki wakreh MDM kam kiwa chet ha ki skur hapoh chnong Mihmyntdu, da pynman ki ya ka ya thung dieñ ha Mihmyntdu ha ka 29 tarik uni u bnai ha ka thaw pyndep niam thang kynriñ ya kiwa da khlaad na pyrthai, ya kani da leh kamwa pteiñ ya ka “One Muster Roll Worker, One MDM Cook One Tree.”
Hachwa wa u sdang ka ya thung dieñ da em chwa ka yalang kawa khian kawa da pyllai da u K. L Pariat President ka seiñ, heiwa da yoh ya i klam na u Abul Phawa waheh chnong Mihmyntdu uwa da yaroh ya ka seiñ wa khamtam ya ki wakreh Muster Roll wa ki MDM Cook kiwa na ka chnong kiwa da pynjohkhæ ya ki waheh ka chnong yow ya thung dieñ, heijooh i por da kyntu u ya waroh kiwa thung ya ki dieñ yow sumaar langær ki ya u dieñ uwa thung ki, khnang yow heh yow san u. Natloor u waheh chnong da yoh ya i klam na u Nobert Phawa uwi na ki waheh ka chnong, uwa da e mynsien ya ki wakreh Muster Roll wa ya ki MDM Cooks yow nang tista ki ha i kreh i yong ki.
Hadien wa da dep ka yalang neiliang, u Phrangsngi Sutnga u dkhot ka seiñ, uwa pait ya kani ka “One Muster Roll Workers, One MDM Cook One Tree” chirup wa u waheh chnong, wa u Arki Phawa President ka Seiñ Raij Mihmyntdu wa u Nobert Phawa da ya saam lang ki ya ki 230 tylli ki tre dieñ cha ki wakreh Muster Roll ki MDM Cook wa cha ki dkhot ka chnong Mihmyntdu chynrang wa kynthai. Ha kani ka ya thung dieñ da ya em lang ka K. Chyrmang Vice President wa ka N. Toi General Secretary wa ka J. Lipon dkhot ka All Jaiñtia Mid Day Meal Worker’s Union, Jowai.
Hei yatoh wa ini i thung dieñ, neiliang ka seiñ dap ko dei sñiawngooh ya u Garod L. S. N Dykes Deputy Commissioner ka West Jaiñtia hills, uwa da e ya ki tre dieñ yow yoh ka seiñ u thung, neiliang ki dkhot ka seiñ da dep thung ki kattu la 2530 tylli ki tre dieñ, ha kawa ka seiñ thmu ko u thung wow sumar haduh 5000 tylli ki tre dieñ ha kylleiñ ka ri-loom Jaiñtia.
Ha ka 08-07-19 ka seiñ daw pynman Dorbar ko nadooh 10:00 waje i step ha yung dorbar ka chnong Raliang neibynta ka Laskein C&RD Block, ha kawa daw pteiñ chooh chooh ko ya ka One Muster Roll Workers & One MDM Cook One TREE ha kawa daw saam ko cha ki wakreh Muster Roll wa ki MDM Cooks kamwa 500 tylli ki tre dieñ yow thung ki jar jiar i thaw kreh i yong ki.
Discussion about this post