Jowai: I dawa pynkrehkam ILP ki seiñbhalang hapoh ka jylla nang chit i kat nang mih ki sngi, ynne ka sngi ha Khliehriat, East Jaiñtia Hills District leh ki seiñbhalang wa kynthup yaka FKJGP, KSU, HNYF, JSU da ya mih biang ki wow pynthai yei sur dawa ILP deiwa pynman yaka lai paidbah wada sdang na madan Parish Khliehriat wei da pynkut won ha u mot sahkynmoo u Kiang Nangbah.
Haka yalang wa pynlai da u Streamly Ñiangti, President KSU Khliehriat Circle ha i thaw wa em u mot u Kiang Nangbah hajan ka yung krehkaam u DC, da yoh leh i klam na u Edmund Sumer, Publicity Secretary ka JSU Khliehriat Circle, na u Lamsuk Langstang u President ka HNYF, na u President Synjuk Waheh Shnong East Jaiñtia Hills u Satly Ryngkhlem, na u D.S. War Chief Organising Secretary FKJGP Jaiñtia Hills Zone, u Pynshai Rani, Publicity Secretary Central Body KSU, u Organising Secretary KSU Jaiñtia Hills District Unit u Lenigard Tariang, u President ka FKJGP East Jaiñtia Hills District Unit u Meral Suting, u President ka HNYF Khliehriat Circle u Julias Nongtdu wa kiwi.
Neiliang kini kiwa yahkhmat seiñbhalang da pynsñiaw ki yaka yurim dawa pynkrehkaam ILP hapoh ka jylla, deiwa ong du ka ILP donhi wa man ka stieh wa ye u yada ya i ki jaitbru khian paaid nei wan tlep ki baar jylla. Kamtæ khut kyntu kyrsu ki yei yakrehlang ki paidbah neibynta wow dawa pynkrehkaam yaka ILP haka jylla.
Ha kani ka sngi da em leh i thang yaka durbula ka CAA/NDA kam ka dak i beiñ joor yaka sorkar bei hajrong i wanrah yong ka wow pynkrehkam yaka aiñ CAA hapoh ka ri India deiwa e laad ya kiwi won ki baar ri u wan chong chnong ki hapoh ka ri.
