Jowai: Ka Indian Red Cross Society, West Jaiñtia Hills District chibynta wow pynkynmoo ya ki paidbah wa chong chnong heiyatoh wow lait nei tyndep i man ha kam ini i por wa em u khñiang COVID-19, da pteiñ chooh ko i saam mynkna ya ki Mask wei sabon.
Ini i saam ya kini ki tiar da man i ynne ka 2 tarik ha yungkrehkam ka Meghalaya Bharat Scouts & Guides, West Jaiñtia Hills District wei ya kini ki tiar da saam cha ki khynnah skur kiwa puræ hapoh ka chnong Jowai.
U Ohiwot Laloo, Secretary IRCS West Jaiñtia Hills District hei yaklam da ong kamwa ka sorkar da e laad ko wow wai ya ki skur næ ki thaw puræ kamtæ leh neliang yong ki chim ki wow leh yeini kam chibynta wow pynkynmoo ya ki khynnah skur wym hoi u kheiñstiñ næ tyndep i man ya ki hukum adong wada booh ka sorkar heiyatoh wow yada nei poor u khñiang COVID-19.
Kamwa pynkynmoo ka Indian Red Cross Society, West Jaiñtia Hills ha ka thong wow yada nei poor yong u khñiang COVID-19 da leh ko chiboon ki kaam deiwa saam ya ki mar-baam mar-dih cha ki thaw ri khonswet, i saam ya ki Mask wei sabon deilang wei pynman ya ki Awareness Program ha ki yaw ki haat wa ki chnong.
