Jowai: Ka KSU ym pu em chong ngiah ko wei dang pteiñ ko wow pynman ya ki yalang pyrchah yaka CAA wei wow pynbor ya ka sorkar bei wow mynjur noh smat u pynkrehkaam ya ka ILP hapoh ka jylla kamwa da dep mynjur da ka yung dorbar chna aiñ ka jylla ha ka 19 tarik uni u bnai.
Hawa klam ha ka yalang pynche paidbah wa pynman da ka KSU Tyrsad Circle hapoh ka chnong Tyrsad, u President rangbah dooh yong ka seiñ u Lambokstarwell Marngar da klam che u katwa ym pu yoh i mynjur na ka sorkar India, daw hiar ki ha waroh ki dong ki kyntoit yong ka Bri Ynñiawtrep wow pynsñiawthooh wei wow pynche paidbah ya i emkaam jhan yaka ILP hapoh ka jylla hadien wa ka CAB da man aiñ pura ko hapoh ka ri waroh kawi.
Da ong u leh wa ini ym mut wa lai put turoi ya ki kaam yong ka KSU cha u paidbah ka Bri Ynñiawtrep tangwa yow man ko kam ka tiar yaleh wow pynsñiawthooh chwa ya waroh ki dkhot ka jaitbru wow chim chwa yaka kitkhlieh wow yada i khyndaw i chyiap, ki riti ki dustur wa waroh ki yong ka jaitbru lada ka sorkar India ym e ko ya i dawa kiwa u paidbah ka Bri u Ynñiawtrep da angnood ki da slem bah.
Da pyntip u leh wa ka seiñ daw ap pait siar ko iyi ka sorkar jylla u leh ko neini chakhmat ha nongbah Delhi wa kiwa yahkhmat ka sorkar bei wow pynbor ya ka ILP wow krehkaam pura hapoh ka jylla.
U Pynshai Rani, Asst. Education Secretary KSU CEC wei uwa man leh u President yong ka KSU Tyrsad Circle da ong u lada i angnood yong i kam ka jaitbru ya ka ILP dang chim por næ u sahteiñ du ha i klam hapyrdi ka sorkar jylla wa ka sorkar bei da man chwa ki kiwa pynkhreh ha kawon kawon ka por lada ka kaam dawa ko.
Ka KSU Sohiong Circle leh da pynman ko yaka yalang paidbah ha Iew Sohiong kam chibynta wow pyrchah ya ka CAA wei dawa ya ka ILP na ka sorkar pyrdi.
Ha kani ka yalang da em leh kiwa yahkhmat ka KSU Central Executive Council kiwa kynthup ya u Sonstar Nongkhlaw, AGS, KSU CEC, u Donald V Thabah, GS, KSU CEC ha ka yalang wa pynlai da u Pasbhalang Kharrngi, Advisor, KSU Sohiong Circle.
Ha kani ka yalang da pynche paidbah da ka KSU hajrong i maa wa yang na ka CAA lyngba i yohlaad da iwa suk ki nong Bangladesh kiwa man Hindu wow psiah suk cha jylla Meghalaya lyngba u pood u ang uwa jrong 443 Km wa lyngba ka Assam. Chooh chooh da pyntip cha ki paidbah wa ki Bangladeshi kiwa man Hindu em ki hadooh 1.40 klur ngut katwa ki Khasi won em ki du 14 lak ha ki jylla Meghalaya, Assam, Tripura, Mizoram, Manipur wa ha ri Bangladesh.
Da pyntip leh wa lyngba ka Indo Nepal Friendship Treaty 1950 i wan buhai chnong ki bru na Nepal man i iwa joor bha cha jylla Meghalaya kawa da sakhi hadooh katni hapoh sor Shillong wa ki thaaiñ khappood hanlada ka Nepal jngai ko da ki hajar kilometer na jylla Meghalaya.
Ya kani ka yalang da pynkut da iwa thang ya ki dur nula yong u u Narendra Modi, Amit Shah wa Agatha Sangma.
Discussion about this post