Shillong: Ka lympung yalehke football ki khynnah kawa tip kam ka Meghalaya Baby League da pteiñ ko ynnin heiwa da em 30 tylli ki yalehke waroh chi sngi yong ki dhab ha ki kyrdan waphær waphær, ha Jawaharlal Nehru Sports Complex, Shillong.
Waroh da wan chimbynta hadooh 12 tylli ki dhab kiwa yakhun ha ki le tylli ki madan wa kynthup ya ka Third Ground, ka Jawaharlal Nehru Stadium wa ka Futsal Ground.
Ki khynnah chynrang wa kynthai ha ki kyrdan 4-5 snem wa 6-7 snem da pynyoo sakhiat ki ya ka sap yong ki ha madan yalehke heiwa ki yakhun da kut ki dei khmat wa sooh-rhai lada jop næ rem ki.
Ka sap nawon wa da pynyoo da ki khynnah kiwa ha ka kyrdan 12-13 snem da man ko kawa rap pnah bha neibhah da pynyoo sakhiat ki ya ka sap yong ki ha ka yalehke football. Ya kiwa wan chimbynta da wan e mynsien ya ki da ki lok ki jor, kiwa hayung hasem yong ki kiwa da wan cha kini ki madan yalehke wow kyriaw ya ki dhab wa kyrchaan ki.
Ka yakhun da sdang ko na ka Western Conference heiwa ka Langsning Greenergy Lions da jop ko ha waroh ki kyrdan yalehke pyrchah ya ka Kickstart Rhinos. Ka Mawlatbah SC Hawks won da jop ko ha ki le tylli ki kyrdan pyrchah ya ka ENE Falcons ha ki kyrdan wa khian wei ka ENE Falcons da jop won ko ha ki ar tylli ki kyrdan yong kiwa da heh rta. Ka Little Star Clouded Leopards, da jop ko ha ki soo kyrdan pyrchah ya ka Unified Gorkha Gators kawa da jop du ha kawi donhi ka kyrdan.
Ha ka Eastern Conference won ka Wahlahkhiat Bulls da jop ko ya ka JNS Jaguars ha waroh ki san kyrdan, katwa ka Touchline NE Cubs da jop ki ar tylli, da ya-dro ar tylli wei da rem ko ha kawi ka kyrdan pyrchah ya ka Sunnydale School Doves. Katwa ka Nongthymmai GC Scorpions, da jop ko ha ki soo kyrdan pyrchah ya ka Nongtrai Cheetahs kawa da jop du ha kawi donhi ka kyrdan.
Discussion about this post