Jowai: Ka Meghalaya People’s United Front (MPUF) Laskeiñ Block Circle, da pteiñ biang ko wow saam khoo cha ki 55 tylli ki manyung wa dooh ha chnong Iongkwang, West Jaiñtia Hills District, ynnin ka 15 tarik u Naisan.
Neiliang u Publicity Secretary ka seiñ u Eibormi S. Passah, ha chwa u saam ya u khoo da kyntu u ya kiwa yoh yarap yong ka chnong wow kohngooh ki kamjooh leh u bood ki ya ki kyndon yong ka chnat i chait i khiah hei wow pynyajngai uwi na kawi (Social Distancing), wow deiñ ya ki Mask kamjooh leh u sait khooid bha ya ki kti da i sabon waka um yow yada na ka khlam COVID-19.
Ha kani ka sngi da emlang u President ka seiñ u Phrang Suiam, u S. Wann Assistant Secretary, ki dkhot ka seiñ wa ki waheh yong ka chnong. Neiliang ka seiñ da ong ko wa u chimkhia katwa ye u yarap neibynta ki paradoh parasnam kiwa em hapoh ka District kamjooh leh hapoh ka jylla hi heini i por wa em i saja i duna.
Discussion about this post