Ka seiñ Sarot I Man kawi naka seiñ wa da lai luti la kamwa kattu katni bnai heiyatoh wa ki kaam wabha yong ka, ynne won ka sngi da chim ko yaka bynta wa rap khroo tam itæ toh deiwa li e snaam sñiawbha ha Jowai Civil Hospital Blood Bank, Panaliar.
Haka yalang wa tbian wa pynlai da u Shape Paswet, u dkhot ka Sarot I Man, neiliang u Riquoma Laloo uwa man leh kam uwi naki dkhot, khana u wa ka thong wa sdang ki ya kani ka seiñ toh wa em ki yei angnood heiyatoh wa kammon u thooh ki lad ki luti yow e yarap yaki bru wa dooh wa chem chitom saja wot kiwa hajan cha jngai.
Ong u wa hei lai luti yong ki da sdang ki deiwa lai e yarap da ki that ki sula cha ki thaw nongkyndong, wei hawa ye ki u e yarap dap ki dei mynsiem wa kmen hanla man iwa khian leh tangwa toh neibynta i bha i miat.
Neiliang ka Dr. P.Shylla, kawa pait yaka Blood Bank Jowai, hawa e yei klam pynsñiaw ko i sñiawkmen sñiawburom yaka Sarot I Man wa da wan ko chakhmat u e sñiawbha yei snaam neibhah wa i snaam man ko kawa emkaam tam hei im u bru, khamtam hei kjut chitom. Da kdaw ko leh waki bru wa tyngkhooh yei jia tyrrah kari, ki manbei wa kha khon toh kiwa emkaam u yoh smat bha yei snaam najrong kiwi ki kjut.
Katwa kamtæ i snaam man iwa dawa bha wow em haki Blood Bank khnang wa lada em kiwon kiwon kiwa chitom leh u ye wow e yarap yaki heipor wa biang.
Heijooh i por da pynsñiaw haroh ko yaki kyndon wa emkaam chwa wow e snaam, najrong wym toh u tieñ wow wan chakhmat u e snaam neibhah wot neiliang ki bor ka Blood Bank leh chwa wow chim daw em boon ki kyndon wow pyndep ki nadooh i kylli takit, ki Test yei snaam wa kiwi, wei lym yoobiang, ym chim snaam hi ki la jia wa u bru kwah u wow e leh.
Kamtæ kyntu ko ya kiwi tawan leh wow wan e sñiawbha ki yei snaam, neibhah i e snaam wym du wa yarap ko yei mynsien kiwi tangwa yarap ko leh wow pynchait yei pran u bru wa e.
