Ka All Jaintia Muster Roll Workers & Labour Union (seiñ bei) Jowai, chirup wa i yakrehlang wa u Waheh Dong ka Dorbar Dong ka Loompyrdi, Loom Chyrmang Mihmyntdu, Sutnga chirup wa ka M. Nongrum Deputy Labour Commissioner ka East Jaiñtia wa kawa pait ya ka West Jaiñtia Hills District, ka A. Pariat kawa pait ya ka Common Service Centre (CSC) ha West Jaiñtia Hills District wa u H. Phawa ka East Jaiñtia da pynman ki ha kani ka tayaw ya ka yalang pynsñiawthooh wa i pynpsiah pyrtuid ha ka e-SHRAM yong ka sorkar India kamwa man ka yong ka Ministry of Labour yow tipmit noh ko yei pyrtuid ya ki wakreh mylla.
Ya ka yalang pynsñiawthooh da pynlai da u Khroo L Pariat, President ka All Jaiñtia Muster Roll Workers & Labour Union kamjooh uwa da batai bniah hajrong ka e-SHRAM heiwa da khana u wa neiliang yong ka seiñ da lai pynman yalang ko ha kiwa boon ki chnong ka ri Jaiñtia neibynta ki wakreh mylla kiwa yoh nong hapoh T. 15,000 ha ka chi bnai. Da kyntu u ya waroh ki wakreh mylla wow pynpsiah pyrtuid ha kani ka e-SHRAM Scheme neibynta u chngaaiñ u im lyngba i yarap ka sorkar India na kani ka Scheme. Kattu neini chakhmat du kitu kiwa da dep pynpsiah pyrtuid donhi ha ka e-SHRAM u tipmit wa u yoh yarap na ka sorkar India khamtam manda heipor wa jynjar i chitom ha ka chnong wa ka ri India waroh.
Katda kamtæ, da kyntu u ya waroh ki waheh chnong ha ri Jaiñtia wa u sñiawbha u chimkhia u yarap u e wyrta ya waroh kiwa kreh mylla khamtam kiwa man ki kur ki jait, ki kha ki man, ki lok ki yong i hi, kiwa kreh kam ki Muster Roll ha ka sorkar kam ha ka chnat Soil, Water Resources, Forest, AH & Veterinary, Agriculture, Sericulture & Handloom, Horticulture, ki warep, ki ASHA, ki Anganwadi, kiwa kreh MDM Cooks, kiwa chna yung bru, kiwa kreh MNGREGA namo ka kreh 100 sngi, kiwa tih moo tih chyiap wa kiwi kiwi kiwa kreh nongsngi kiwa em ha ki chnong ki dong yong ki yow tip ki u pynpsiah pyrtuid ha kani ka e-SHRAM kamwa da hukum da ka sorkar India lyngba ka chnat Labour.
Ka Ameecia Pariat ka District Manager yong ka CSC da batai bniah chooh chooh ko ya kani ka Scheme khamtam ki kot wa emkaam bha kam ka Aadhaar uwa da pynyabi wa u Phone Number, ka Bank Passbook wa ka EPIC yow ye u pynpsiah pyrtuid ha kani ka e-SHRAM.
Kiwa mylla kiwa da dep pynpsiah pyrtuid ha kini ki chnong hadooh ka 27-11-2021 da em ki kamwa 358 ngut tam.
Ki chnat krehkaam ka seiñ All Jaiñtia Muster Roll Workers & Labour Union kiwa em ha ki C&RD Block wa ki chnong daw pynman ki kam kani ka yalang neibynta ka e-SHRAM wow pynpsiah pyrtuid kiwa daw pynman ha chnong Nongjngi ha ka 30-11-2021, ha ka chnong Lad Mukhla ha ka 02-12-2021, ha Amlarem Syiem Jingsuk ha ka 03-12-2021 wa ha Jowai wa cha kiwi tawan ki chnong hadooh wa chwa u kut u bnai Kmaichonglad (Dec) 2021.
Ya kini ki yalang da pynlai da ka Dayoo Ïakai Vice President ka seiñ.
