Ka Myntdu Pynthorneiñ Farmers Welfare & Producers Organization, hajrong ka yurim wa ki warep kba u yoh myntoi chooh chooh ki na u symbe kba wa tip kam u CAU R1, da pynman yalang ko wa ki warep ka chnong Mukhla kiwa da rep ya uni u kba CAU R1 nadooh u snem 2019-2021 ha ki hali ha Mojem wa Myntkhor ka Mukhla Raij.
Uni u symbe toh uwa da yarap bha ya ki warep neidaw wa mih bha u wei soi bha u hanla ha ki por wa joor u slap wei chlai um.
Ha kani ka yalang wada pynman haka 5 tarik uni u bnai, ki warep da yoh ki wow e mar san ser (5kg) u symbe tynre, wei da yoh ki u saam sanphaw ser (50kg) cha kiwi won ki 23 ngut ki warep wa ki leh u yoh myntoi ki na uni u kba CAU R1.
Ha kani ka yalang u Khroo L Pariat, uwa e buit ka seiñ, uwa wanrah nyngkong ya uni u symbe kba na ka CAU Umiam, Ri-Bhoi District, da pynsñiaw u i sñiawngooh ya ki warep kiwa man sakhiat kam ki tre ka rymaw, wa dei leh chitom yong ki man-ka-sngi, yoh kiwa boon ki bru yei chait i tram.
Kyntu haroh u ya ki warep wow nang pteiñ chooh chooh ki yei kaam rep da u kba symbe tre wei u pynemkaam leh dei sboh wa jooh pynmyllien nadooh ki warim khnang wa ki pynthor hali u ye ki u pynmih chiboon u kba u khoo.
Heijooh i por kyrpaad haroh u ya kiwa chong chnong wow pynemkaam noh da ki muna that hawa lai yaw lai dukan najrong wow sikai ya ki khon u sangeh yei baam wa song Plastic iwa ktah ym du yei bor tangwa wot yaka um ka la-ær wa i khyndaw iwa pynim ya i ki bru.
Neiliang ka Dayoo Ïakai, President All Jaiñtia Muster Roll Workers & Labour Union, Seiñbei Jowai, ka Malty Suna wa u Pyntngenlang Kyndait, General Secretary MPFW & PO da pynche ki yei rukom wow rep wa i myntoi wa ye u yoh na uni u kba CAU R1.
Puræ leh: Saam symbe kba ka MPFPO cha 20 ngut ki warep
