Kam chibynta i pteiñ yei lehkmen yei dap 25 snem ka College, ynne ka sngi ka Thomas Jones Synod College Jowai da pynman won ko dei yakob Inter-College Traditional Attire Competition wada wan chimbynta da ki khynroo khyllood na ki College waphær ka Ri-loom Jaiñtia.
Haka yakob da chimbynta ka Jaiñtia Eastern College Khliehriat, ka Amwi College Mihmyntdu, ka Riwar College Amlarem, ka Kiang Nangbah Government College Jowai, ka Thomas Jones Synod College Jowai, ka Ummulong Presbyterian College waka St. Anthony’s Extention Byndihati.
Yei naam jop da rah daka Kiang Nangbah Govt. College wada chimbynta da u Trebokmi Talang waka Sophia Laloo. Da wan wa ar ka St. Anthony’s Extention Byndihati wada chim bynta da u Mudang Dree waka Puri Jusmi.
Neitæ haka yakob rwai tynre, chaad tynre won da pynman ya ka yakob hapyrdi ki Department waphær waphær yong ka Thomas Jones Synod College hi, wei yei naam jop hei rwai da jop ka Department of Political Science, wa ar ka Department of Commerce, wa le won ka Class XII (Science).
Hei yakob chaad tynre da jop ka TJSC Hmar Community, wa ar ka Class XII (Arts), wa le won ka Department of English.
Da pynman leh ya ka yakob chet baam tynre heiwa da yoh nyngkong ka Jingiaseng Kynthei Balang Presbyterian Thadlaboh, wa ar ka Jingiaseng Kynthei Balang Presbyterian Khimmusñiang, wa le won Ka Jingiaseng Kynthei Balang Presbyterian Demthring.
Chwa wow sdang ya kani ka lehkmen ynne ka sngi da em leh ka yalang tbian wa pynlai u M. Tyngkan, wei da yoh i klam na u Principal ka Thomas Jones Synod College, u Dr. D.G. Lyngdoh, i klam na u kongsan u Lasky Rymbai, Dy. CEM ka JHADC, katwa yei kyntien khublei da e daka Dr. I. Dkhar.
