Khliehriat: Ka yung krehkaam u District Transport Officer, East Jaiñtia Hills hei yakreh lang waka East Jaiñtia Taxi Owner Driver Association (EJTODA), ynne ka sngi da pynman biang ki yei sylli ya ki kari samen wa kamai pyrchah yaka aiñ hapoh ka District, wei da yoh ki leh wow ksoh ya ki kattu katni tylli ki kari kiwa da pynngat leh yaki haka Section 192(A) ka aiñ MVA.
Hawa yaklam wa u D. Lamin uwa man u DTO yong ka Khliehriat, da ong u i pteiñ wow sylli yaki kari samen wa kamai khlem da em ka Permit toh kam chibynta wow pyndooh jait ya kini ki jait kari wow kamai hapoh District yow man leh kam cha kiwi ki District yow suk kam haki thaw sor, da ong u leh yaki kari wa da yoh u ksoh da pynngat yaki haka Section 192(A) kawa da thoh che kiwon kiwon ki kari wym em Permit ym ye ki wow kamai wei da daiñ kuna leh yaki mar T. 10,000.
Chooh chooh da khana u wa kiwa kamai kari da ki kari Private hawa kem yaki da pyrchang ki wow sneiñ ya kiwa chong kari wow ong toh kiwa chi yung chi sem, kamtæ oo kam u DTO wa toh u pait ya ini i kaam da paan u yei kyrchaan naki paidbah wa chong chnong ka East Jaiñtia wow yakreh lang ki kam chibynta wow jop yeini i kaam deiwa pynrap wa kiwa kwah wow kamai, ye ki wow wan yaleh Permit heiwa hadooh kattæ dang e mynkna yaka.
Hawa kylli na kiwa kamai kari da pynsñiaw ki yei sñiawdiaw hawa yatoh wa ini i kaam neidaw wa boon ware ki kari samen wa kamai kamtæ da hiar bha i kamai yong ki hadooh wa ym ye de ki wow su ya i bai dan cha ka sorkar.
