Jowai: Ka Swachhta Hi Seva toh kawi na ki program yong ka sorkar India wa da khut pynman ha kylleiñ ki thaw ka Ri hajrong ka thong yong ka Swachh Bharat Mission.
Kamtæ ki bor wa pait wa pyllai yong ki kattu katni tylli ki thaw puræ wa em ha ki kyrdan Elementary Level yong ka West Jaiñtia Hills District dei sñiawkhia da khut pynman ki ya kani ka program kam chibynta wow pynyoo i yaksohktilang hei yaleh wow wanrah yei khooid i jngiar ha ki liang waphær waphær.
Hapoh ka chnong Jowai ya kani ka Swachhta Hi Seva Prokram da sakhi wa da chimkhia u pynman da ki skur wa kynthup ya ka Pohmusiang SSA UPS, Panaliar UPS SSA, Little Flower UPS, Dulong UPS SSA, wa ka Loompyrdi Iongpiah LPS & UPS SSA. Katkam ka wyrta khubor wa yoh na ki bor pyllai yong ki skur da ong wa ya kani ka program da booh thong wow sdang nadooh ka 2 tarik u Naichphaw wei u kut won ko ha ka 15 tarik yong uni hi u bnai wei da khanna leh wa ya kani ka progam da chim wow pynman kam chibynta ka dak i kynmoo burom ya ka sngikha wa 148 yong u Mahatma Gandhi kamjooh leh i kynjooh 3 snem i lai luti ka Swachh Bharat Mission.
Ki program kiwa da chim u pynman da ki skur toh i sikai wei batai ya ki khynnah chaphang i khooid i jngiar wei chait i khiah heiwa ya ka bynta yong i klam i batai, pynche pynsñiawthooh ya ki khynnah da e da ki wa sikai wa kiwi kiwi ki bru chemphang, i purae ya ka Swachh Bharat Pledge hei yahkhmat ki student Ambassador neitæ won i pynkhooid pynjngiar ya ki skur kamjooh ya ki thaw em parom, thaw kyntang yong ka chnong ka thaw.
Discussion about this post