Jowai: Ynne ka 13 tarik u ka RC Eve UPS SSA Mihmyntdu leh kam chibynta yong ka Swachh Bharat-Swachh Vidyalaya Programme wa ka World Environment Day Celebration 2017 da pynman ko ya ka Awareness Programme hajrong ka thong yong kani ka sngi kamjooh wei thung ya ki dieñ, ki syntu ha pchem skur wa ki thaw wa em hajan, i pynkhooid ya ki soodong sookun ka skur iwa man hapyrdi i chimbyntalang ki khynnah skur wa kiwa sikai.
Neiliang Ka kong Jesica Biam, Head teacher RC Eve UPS SSA Mihmyntdu hei chim ya ka bynta wow e i klam i batai hajrong ka thong yong kani ka prokram da kdar ko wow khana pynsñiaw ya ki bynta yong ka Swachh Bharat Swachh Vidyalaya kamjooh leh ya ki bynta wa yatoh wei long i man ki soodong sookun ka Bei Rymaw.
Ka Jesica da kyrsu kyntulang ko ya waroh kiwa yachimbynta ha kani ka prokram wow kitkhia ki jar jiar i kaamram hei wow wanrah yei khooid i jngiar nadooh nayung nasem hadooh halait kamjooh leh wow yaleh u sumaar, pynneh pynsah, pynmiat pynyoosuk yei man i doh i pran ka Bei Rymaw khnang yow man i thrang i angnood ka sorkar India iwa jop wei u poi cha ka thong.
Kiwi tawon ki skur kiwa dachimkhia u pyndep ya kani ka prokram ha ka 9 tarik u Naiynru toh ka Iongnoh Presbyterian LPS SSA, ka Iongnoh UPS SSA, ka Mustem UPS SSA, ka Umchangiar LPS SSA wa ka Dong Nongpluh LPS SSA.
Katkam i e wyrta khubor u CRP yong ka Mustem CRC u Borki Nikhla da khana u wa neiliang kini ki skur wahaap hapoh ka Mustem Cluster dachim ki wow pynman ki prokram waphær waphær kiwa kynthup ya ka Awareness Programme, ka Cleaning Drive, ka Pledge Reading, ka Drawing & Painting wa i thung ya ki syntu, ki dieñ ha ka thong wow pynman ya i pchem skur iwa yoosuk wei yohlaad u sap u kup yei dur wa pyngngaad ha ki por ki snem ki wow wan.
Discussion about this post