Shillong: Hapyrdi u slap wa joor ynne ka sngi, ki yalehke ha ka lympung Meghalaya Baby League 2018 da man ki kiwa lai bait da ki yakhun heiwa ka Kickstart FCC Rhinos, Langsning Greenergy Lions wa ka Wahlakhiat Bulls da man ki kiwa jop.
Da pynyaleh hadooh 15 tylli ki yalehke ha ki le tylli ki madan wa kynthup ya ka – Third Ground, Jawaharlal Nehru Stadium wa ka Futsal Ground – ha Jawaharlal Nehru Sports Complex, Polo Ground, Shillong.
Kani ka lympung MBL 2018 toh kawa da pynman chirup da ka Tata Trusts, Meghalaya Football Association waka All India Football Federation.
Ki yakhun da sdang ki da ka dhab u Eugeneson Lyngdoh wa tip kam ka ENE Falcons pyrchah ya ka Rhinos, heiwa ka Rhinos da jop ko ha waroh san tylli ki kyrdan. Ka Falcons da jop ko ha ka kyrdan 6-7 snem (heiwa ki kool man ki 7-2). U Febian Sohtun (4-5 snem) wa u Jefferson Malngiang (10-11 snem) da thap ki mar soo kool neibynta ka Kickstart ha ki jar jiar ki yakhun yong ki.
Ha kiwi tawon ki yakhun, ka Wahlakhiat Bulls da jop ko ha ki soo kyrdan prychah ya ka Nongtrai Cheetahs, wei ka Nontrai da jop won ko ha ka kyrdan yong kiwa 6-7 snem.
Khaddooh ka Greenergy Lions ka Langsning da jop ko ha waroh ki san kyrdan pyrchah ya ka Mawlatbah SC Hawks.
Ki yakhun ynne da em wa man ki kiwa khlan chiliang, hanla kattæ leh ka Hawks da pynyoo ko yei sap yong kiwa yalehke yong ka heiwa ha ka kyrdan 4-5 snem, uwa yang kool yong ka da jop u yei mynsien yong waroh heiwa da pynyoo u yei sap wa pliah yong oo. Hanlada kani ka yakhun da kut ko da 10-0 deiwa jop ka Langsning, tangwa uni uwa yang kool da pynduna u ya ki kool wa chah pynrem ka dhab yong oo.
Discussion about this post