Ynne ka sngi ki chipai People’s Liberation Army (PLA) ka China da pyllait ko ya ki san ngut ki khynroo na Arunachal Pradesh, wei yeini da pyntip da u Kiren Rijiju uwa man u montri ka sorkar pyrdi na ka jylla.
Kini ki san ngut toh kiwa da psiah bakla chapoh China heipor wa lai siat doh ki ha ki khloo wa rben wa em ha Upper Subansiri District ka jylla.
Ya kini ki san ngut da pyllait ha Kibithu heiwa u Rijiju da yaroh u ya ka Indian Army, ka yung krehkaam ki chipai Indian Army, kamjooh leh ya u montri yada ri ka India, u Rajnath Singh.
Da pyntip u leh wa kini ki san ngut man ki kiwa chait wei daw haap chongkset ki kattu katni sngi.
