Pyllait u Ma S C Laloo ia ki kari Bolero Pick-up ka Horticulture cha ki 4 tylli ki SHG

Jowai: Ynne ka sngi musiang da em i pyllait paitbah ia ki 4 tylli ki kari kit tiar kiwa sam da ka ophis ka tnat District Horticulture West Jaiñtia Hills lyngba ka skim Post Harvest Marketing Scheme 2013-14. Kiwa ioh ia kini ki kari toh ka Nam Rhenlang Multipurpose Cooperative Society, Kudengrim, ka Chiruplang SHG, Sahsniang Saitthat, ka Chiruplang SHG, Mookyndur wa kas Muloom Grower Association, Muloom.

U Ma S C.Laloo Additional DC WJH ha i klam kam u kongsan da pynpaw u i sniawkmen wa ka sorkar em ko kam kani ka jait skim kawa u iarap ia ki paid warep heiwa u kyntu kynrong yei kamai kajih iong ki khamtam ha kam kini kipor wa chynkhan wa eh wa iabor bha i khih i khan. Da kyntu u ia waroh 4 tylli ki SHG ki kynhun wa ioh bhah ia kani ka skim wa u pynemkaam hok ki ia kini ki kari heiwa u kit u bah ia ki mar rep iong ki na loom na hali cha ki thaw pyllang kamjooh u pynpoi cha ïaw cha hat yow pyllai ïaw ia ki mar dang biang por.

Banjoor u wym hoi u pynemkaam bakla ia ki kari kam cha i laike iong yung iongsem wa kiwi kiwi ki kaam kiwa ym myntoi. Ong chooh chooh u wa na kam kani ka lad e wa u ku i kamai ymtoh du ia ka sein, u iarap haroh ko u pynroi ia ka chnong ka thaw.

Ka kong M Shylla I/c District Horticulture Officer ong ko wa kini ki 4 kynhun man kiwa chah jied na kiwa boon kiwa wan thap pyrtuit wow ioh bhah ia ki kari, tangwa hadien i wichar bniah da chem wa kini ki 4 SHG man kiwa biang bha u ioh ia ka kani ka skim PHMS kawa sam da ki kari kit tiar. Ha i klam waiphang iong ka, yoo luti ko ia ki warep wa na kam kini ki lad ki luti wa u ye ko u kyntu kynrong sakhiat ia i rep i riang, wei u kitkhia ki warep u pyllai ïaw ia ki mar rep iong ki cha kylleiñ ki ïaw ki syiem ka District.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Ong haroh ko ia kini ki 4 kynhun wa ioh bhah ia kini ki Bolero Pick-up u nang pynroi chooh chooh ki, wym toh u hun ki du katni kam wa ioh hi eh, ong ko leh wa emkaam u booh i-sap i-tap deiwa bniah khnang yow tip yei ioh i dooh wei yow chemphang kammon u pynbeit yei duna. Kini ki Bolero ymtoh kiwa ioh makna, toh kiwa ki SHG duk ki u pyndap poisa 2lak 15 hajar tyngka katwa na ka ophis won 4lak tyngka. Ia kini ki kari da saam da u Ma S C Laloo ha ka yalang wa pynman ha pchem Circuit House Jowai, ha i sakhi lang kiwi an ki heh sorkar District kam u ma L. Laloo DAO, WJH, u bah B.S Majaw Asst. Registrar Cooperative WJH wa ki wabu ka ophis DHO Jowai.