Jowai : Ka ophis yong u Research Officer, Agriculture, ka Krishi Vigyan Kendra (KVK) waka ophis Agriculture Jaintia Hills District da pynem warom ki ya ka World Soil Day næ ka sngi wa kyrpang ka khyndaw, ynne ka sngi ha Community Hall Khliehriat West, East Jaintia Hills District. Ka phang ha uni u snem toh “Soils and Pulses, a Symbiosis for Life”.
Hei klam yahkhmat wa da e da ka B.M. Majaw Research Officer, Jowai da ong ko wa i daw wa booh ya kam kani ka sngi u kynmo warom yei khyndaw toh wa man i iwa e kyrpang da u Blai, iwa e baam ya waroh, e thaw sah kamjooh pynbiang i ya waroh i emkaam kiwa im haka nadooh ki bru wa ki mrad. Kamtæ ka thong yong kani ka sngi toh yow khut lang ya ki paidbah, kiwa kreh sorkar yow ya e wyrta ki hajrong i emkaam u pynneh pynsah ya ka khyndaw ha ka rymaw.
U kongsan ha kani ka sngi u Justine Dkhar hawa e yei klam yong oo da pynkynmo u yei kordor ka khyndaw neibhah ka ri India toh ka ka ri wa man wa ar hei boon bru ha ka pyrthai neibhah kat dang boon bru i bam leh dang emkam chooh chooh, kamtæ lada ym yoh ya ka khyndaw wa miat, i bam leh da chitom u yoh, neitæ i daw ynne ka sngi da chong hok wow leh warom ya ka.
Kiwi won wa e yeiklam kynthup yow Deputy Commisioner East Jaiñtia u W.R. Lyngdoh, u E. Laloo District Soil & Water Conservation Officer wa kiwi kiwi.
Ha kani ka sngi leh da e sikai ya ki warep hei yatoh wa kammon u leh yow yoh ya ka khyndaw wa sboh wa miat, da batai haroh ya ki wow thung ya ki jait jhoor wa man kam ki sboh wa pynmiat pynbha ya ka khyndaw.
Da kyntu leh ya ki warep yow wanrah ki ya ki khyndaw neithaw wa rep wa riang ki yow yoh u examine wei wow pyntikna cha ki wa ki won ki jait jhoor wa miat u rep ki yow lait u sep-ai i por ki yow yoh nong ki na i rep.
Ha kani ka sngi da saam leh pyllat 100 tylli ki Soil Health Card cha ki warep wa wan chimbynta ha kani ka sngi kiwa da dep phah test ya ki khyndaw yong ki, wei ha kani ka card da thoh leh ya ki rukom man ka khyndaw wa ki jait smybe wa miat u rep ki.
Discussion about this post