Kiwa yahkhmat ka All India Trinamool Congress da lai kbai wei rah Placard ki ha New Delhi yow dawa yei tipmit noh ya ka ktien Khasi wa Garo hapoh ka Eighth Schedule ka riti synchaar ka ri wei wow pyndam noh ya ka soskular pynbait pood hapyrdi ka Assam wa Meghalaya.
Da ya emlang ki MP ka All India Trinamool Congress deilang wa ki MLA yong ka na Meghalaya kiwa da lai wow pynman yakhih ha lait ka Parliament ha New Delhi hajrong ki phang wa ktah ya ka Meghalaya.
U Dr. Mukul da ong u wa ka soskular pynbiat pood toh u man ko kawa pdiang da ki paidbah tangwa ha ka soskular, ki thaw wa da em ha ri-loom Khasi nadooh ki por warim wajah dapoi ki cha Assam. Wei lada lai ini chakhmat daw ktah bha ko ya ka mynried ka mankawi.
U Dr. Mukul Sangma da ong u wa da em i dawa wa da slem na ki paidbah ka Meghalaya yow tipmit noh ya ka ktien Garo wa Khasi hapoh ka Eighth Schedule yow pynneh pynsah ya waroh ki ktien ki jaitbru ri-loom wei da ki snem kiwa yahkhmat ka jylla ym em ieh ki u leh iyi iyi yow tipmit noh ya ka ktien Khasi wa Garo wei katni da biang lut waroh ki kyndon yow tipmit noh ya kini ki ar tylli ki jait ktien.
Tangwa da ong u wa ym sñiawthooh u yei daw wa pynslem ka sorkar India yow pyndep noh yeini wei ini daw e laad ko leh ya ki khynroo wow yakhun ki da ka rynsan wa ya ryngkat wa kiwi.
Ka yakhih wow tipmit noh ya ka ktien Khasi wa Garo toh kawa da pynman da boon snem hapoh ka jylla tangwa ha Delhi dang ini wa da pynma yakhih.
