I dur ki soo ngut ki bru da poor i ha u WhatsApp heiwa ki paidbah da pynbaad ki wa kini ki bru toh kiwa lai lute.
Neiliang ki pulit ka Ladrymbai Police Out Post da pynche ki hajrong ini deiwa ong wa ha ka 21-06-24, u SI L. Tron na ka Khliehriat Police Station da pyntip u wa kawi ka kari Celerio (rong lieh) wa em Number ML-11-2607, da suba wa pynemkaam ka hawa lai lute wei deiwa tip yeini da yoh wow kem ya kani ka kari ha ka miet ka 21 tarik hi da ki pulit ka Ladrymbai kiwa leh ya ka Night Patrolling.
Hapoh kani ka kari da em soo ngut, u Ryngkat Lapasam, u Kyrpad Nongtdu, u Victor Dkhar wa u Nimo Shyrmang kiwa da chah rah cha Ladrymbai Police Out Post wei da pyntip cha u SI L. Tron uwa wan yow rah ki cha Khliehriat Police Station yow takit ya ki.
Ha ini i takit ya kini ki soo ngut da chem wa ymtoh kini kiwa emkti wow lute wei da chah pynbaad bakla ki, kamtæ da pynlait noh ki.
Ynne ka sngi won, kini ki soo ngut da wan mih biang ki cha Ladrymbai Police Out Post neidaw wa i dur wa chon ki pulit ki heipor wa em ki ha kani ka Out Post, da em wa pynpoor ki ha WhatsApp deiwa ong wa kini ki bru toh kiwa lute bru.
Kamtæ ki pulit da pynche ki wa kini ki bru ymtoh kiwa emkti wow lute bru wei da kyrpaad leh ya ki paidbah wym toh u pynpoor yei dur neibynta i chngaaiñ kini ki bru hei lai i wan yow lait na iwon iwon i jia wa sñiawsih.
Discussion about this post