Kiwa pynlai yaka Elaka Nongkhlieh East Jaiñtia Hills District, nadooh u Dolloi u ka Elaka u N. Sukhlain, ki waheh chnong waphær waphær yong ka Elaka wa kiwa chong chnong yong ka Elaka Nongkhlieh da beiñ wei da pyrchah joor ki hajrong i toor pood ka Elaka Sutnga kiwa da mih paidbah ha kani ka 23 tarik. Da ong wa ya ini i wan tih pood yong ka Elaka Sutnga ha katai ka sngi da leh khlem da pyntip lang cha ka Elaka Nongkhlieh kamjooh leh cha ka JHADC.
Neiliang ka Elaka Nongkhlieh da ong ki wa i tih pood yong ka Elaka Sutnga chadooh ki thaw wa toh hok yong ka Elaka Nongkhlieh toh iwa da leh khlem yurim, deiwa ong leh wa nadooh ki spah snem wa da dep ym jooh tip ki wa ka Elaka Sutnga ka em ko ya u pood u ang chadooh i thaw tlep-bru, ka madan yalehke bol, ki hali ki khloo kiwa da dep Register wei kiwa em leh ya ki Land Holding Certificate kiwa da e daka JHADC kiwa da chah ktah ha ini i toor pood yong ka Elaka Sutnga kiwa toh ki hok yong ka Elaka Nongkhlieh.
Ki chnong yong ka Elaka Nongkhlieh kiwa chah ktah ha ini i toor pood kynthup ki ya ka chnong Tongseng, Shnong Rim, Khaidong, Lum Bangla, Lumthymme, Moolasngi wa Lumthari kiwa haap hapoh u pood u ang yong ka Elaka Nongkhlieh.
Hawa yatoh wa ini toor pood, neiliang ka Elaka Nongkhlieh da kyntu joor ko ya ki bor yong ka District Council wow sñiawbha wow wan pynbait ya u pood u ang uwa toh hok hapyrdi ka Elaka Sutnga waka Elaka Nongkhlieh.
Kani toh katkam ka khubor wa da phah da ki dkhot ka Elaka Nongkhlieh.
