Ka seiñ HYC-War Jaiñtia Circle da pyntip ko wa lyngba ka RTI wa da yaleh ko hajrong i thung kreh da ka yung krehkaam u Sub-Divisional Officer (Civil), Amlarem Sub-Division, da chem ko wa thung kreh ya ki arngut kam ki LDA hadien wa pynmih ya ka Advertisement tangwa khlem da pynman ya ka Written Test, Computer/Typing Skill waka Personal Interview kamwa da pynbna ha ka Advertisement.
Ka Advertisement toh kawa da pynbna ha ka 26-04-21 kawa neibynta i thung kreh Contractual Basis tangwa neidaw wa wan ka la-ær wa ar ka khlam COVID-19 da hap wow pynsangeh chwa ya ini i yaleh kreh iwa da booh wow sdang nadooh ka 22-05-21 hadooh ka 31-05-21.
Ha ka 27-05-21 u SDO ka Amlarem Sub-Division da pynmih hukum u yow thung kreh ya ki arngut kam ki LDA deiwa su tulop T. 12,000 chi bnai ka wow kam kam ka kreh Contractual donhi neibynta ka 89 sngi kat wym pu yoh ya ki bru wakreh wa pura lyngba ka DSC.
Hadien ini da pynman ya ki Written Test ha ka 13-09-21 heiwa da em 133 ngut kiwa da chah jied wow yaleh heiwa na kini da jied ya 8 ngut wow yaleh ya ka Computer Test wa Personal Interview ha ka 14-09-21 wei hadien wa pyndep ya ini waroh, ki arngut kiwa da dep chah thung chwa da man ki jooh kiwa wan chakhmat dooh itæ kiwa yoh nyngkong wa kiwa yoh wa ar ha ini i yaleh kreh.
Ini da pynphylla ko ya ka seiñ kawa da ong wa em i thung kreh sop sop, deiwa ong wa kammon da ki jooh kiwa da thung chwa chipor donhi da man ki leh kam ki jooh kiwa yoh nyngkong wei yoh wa ar ha ini i yaleh kreh, deiwa e por 7 sngi wow pyndam kreh ya kini ki arngut wei kamjooh leh wow beh kreh ya waroh kitu kiwa da thung sop sop ha ki snem wa da dep wei lym kamtæ ka seiñ daw e ko dei thoh cha ka chnat CBI wei daw yaleh da ka PIL.
Hawa yaklam u Wyrta wa u SDO ka Amlarem Sub-Division, u Abhilash Baranwal da pynkynmoo u wa ini i thung kreh hadien wa leh ya ka Written Test wa ka Personal Interview toh du kam ka Contractual Basis donhi wei ini toh i sien nyngkong hapoh ka Amlarem Sub-Division wa leh yei thung kreh Contractual deiwa khooid deiwa e Advertisement chwa heiwa nachwa da thung bait lyngba ka Nomination Process.
Heiyatoh wa i thung kreh LDA ya ki arngut chwa wow leh ya ki Test, u Abhilash Baranwal da pynche wa ha itu i por da emkaam bru wakreh jhan bha wei neidaw wa khang leh yei lai i wan ki kari, kamtæ da thooh bru da kiwa em chajan dooh heiwa da wan kamwa 7 ngut wow yaleh kreh heiwa da jied ya uwi uwa na Amlarem wa uwi uwa na Umladthkur kiwa da dep puræ Electrical Engineering wa uwi uwa da pyndep MSC.
Hawa kylli wa kammon kini ki jooh da yoh biang ki ya ini i kreh hadien ka waroh ki Test, u SDO da ong u wa toh wa leh bha ki wei kiwon kiwon ye ki wow wan sylli ya ki Marks iwa da dep wow pynmih paidbah chwa.
