Heiyatoh wa iwa jia wa dung u Surseh Prasad Singh (60 snem) pyn ya ka kurim u ka Poonam Singh, ha yung ki wa em ha Shillong ha ka 31 tarik u bnai wa dep, neiliang ka khon ki da pynbaad ko wa ki pulit da pyrchang ki wow pynbor ya ka wym toh u lai ko chakhmat heiyatoh wa ini i kaam wei toh u pyrkhat ko yei puræ puthi ko neibhah kammon u jia lada e lut u pa ko yei hot i pot ka yung ka sem cha kiwi.
Kani ka khon ki kawa da sakhi ya ini wa jia da ong ko wa hei step katai ka sngi, ka bei ko da paan poisa ko na u pa yow thied baam wa kiwi ki mar wa emkaam ha yung ha sem wei da sñiaw ko yei yamai ki wei manda sñiaw won ko yei kiad ka bei ko da hiar ko cha wah wei da yoo ko wa u pa ko da dung u ka ka bei ko da ka tari wa pynemkaam ha kamra chet ja wei da kynjat u ka leh.
Kani ka khon da khana ko wa ki pulit ka Laban Police Station ym em bien ki wow kem ya u pa ko nadooh nachwa leh hanla da dep e FIR neidaw wa u pa ko toh uwa em bor uwa man leh kam u Director ka Shillong Club, ka Shillong Golf Club wa u heh ka Rotary Club.
Da khana ko leh wa katni won ki pulit da pynngat ki ya u pa ko ha ki kyndon wym biang wei da pynbor ki leh ya ka wym toh u lai chakhmat wa ini i kaam hanla u pa ko da pynchitom u yaka bei ko da slem kattu kamtæ ka ym kwah ko wow kut næ u tlep ki pulit yeini i kaam neibhah ka bei ko da hap ko wow chah soor i kti neidaw wa chah dung ko.
Chooh chooh da ong ko wa u pa ko nadooh wa dep bia ki da sdang u wow dat u choh ka wei ha katai ka sngi wa jia khaddooh da yut u na yung mar ya jia ini wei da wan yung u ha ka sngi wa bood.
Da pyntip leh wa da dep ki wow lai rah ya ini i kaam cha ka Meghalaya State Women’s Commission ha u snem 2017 deiwa khana leh wa u pa kani ka khynnah da pyrchang u wow phah pyndih dawai yabor ya ka bei ko dei thmu wow pynman ka kam kawa da biej.
Discussion about this post