U Deputy Commissioner ka Kolasib District, Mizoram da thoh u cha u Deputy Commissioner ka Hailankandi District, Assam ynnin ka sngi hajrong i chah dat wei chah rahbor uwa yah JCB da ki pulit ka Assam ha Aitlang.
Neiliang u DC ka Kolasib da ong u wa hei janmiet ka 2 tarik uni u bnai ha Aitlang ha i thaw u Pu Lalngaisanga heiwa dang chna ya u sarok yow lai cha ka thaw rep wa da leh da ki warep kiwa da chim wai da ka JCB wa em ya u Number MZ-05A-4464 tangwa ki pulit ka Assam Police da lai pynthut ki ya ini deiwa tympra leh yaka dwar kani ka pooh chi-loom wei da knieh leh ya u chabi na uwa yah ka uwa tip kam u Pu Lalnarammawia.
Chooh chooh da ong leh wa ya uwa yah da tymmoh yei khmat u wei da rahbor ya oo deiwa mang suloi hei khlieh u da ki pulit ka Assam kiwa sap sula Commando. Hadien ini da taan ya oo cha kawi ka wah heiwa da pynjæd ya ki sula u wei da maham leh ya oo. Da chim leh ya ka Mobile Phone u deilang wa ki chabi ka JCB da ki pulit ka Assam.
U DC da ong u wa ini toh iwa da ktah bha yei yaklam yasuk katni wei daw kynaad chooh chooh neidaw wa da pynemkaam dei bor da ki pulit wa em ha kani ka thaw.
Kamtæ da kyrpaad wow pynchitom ya kiwa emkti wei wow pynuiñ ya ki tiar wa da knieh da ki pulit ka Assam cha u tre ka JCB.
Neiliang won u SP ka Hailakandi u Gourav Uphadhyay da kyntait u ya ini deiwa ong wa ym em pynmynsoo lane wa rahbor ya uwon uwon wei iwa jia toh wa ka Mizoram da pyrchang ko wow chna Camp, wei ya u sarok uwa chna toh uwa haap hapoh i thaw ka Assam. Wei da lai wow pyrchah donhi ya ini.
