Ka seiñ Meghalaya Truck Owners and Supplier Association (MTOSA) da pynbaad joor ko pyrchah ya ki BSF hajrong i piah ka yingkieñ Umpaso kawa em ha u sarokbah ha Sonapur, East Jaiñtia Hills District.
Neiliang ka MTOSA da ong ko wa ki chipai ka BSF da booh ko ya ka Check Post hakhmat kani ka yingkieñ wow kynreh ya ki kari wa lai lyngba uni u sarokbah NH-06.
Ka seiñ da ong ko wa i kynreh ya ki kari da ki chipai ka BSF deiwa pynyieñ ya ki Truck wa khia 40-50 ton (kawi) hajrong kani ka yingkieñ heiwa da neh 4-5 tylli heijooh i por da ktah bha i ya ka hadooh wow piah ko katni.
Ka MTOSA da dawa ko na ki bor district ka East Jaiñtia Hills wow kyrriah ya kani ka thaw kynreh kari ki BSF na kani ka thaw khnang wow pynneh u yada ya ka yingkieñ.
Heijooh i por neiliang ka MTOSA da sñiawkhia ko iwa joor yei piah ka yingkieñ neibhah wa ktah ko ya i lai i wan ki paidbah khamtam ki kari (khian wa kiwa heh) kiwa kit mar.
“Lada lai katni chawah chaneiñ da chem chitom hapoh ka jylla neidaw ka yingkieñ Dwar Ksuid waroh chi kattu wei katni won kani ka yingkieñ Umpaso”, da ong u heh ka MTOSA, u Balen Thubru.
Chooh chooh da ong u wa ka sorkar da toh i por wow leh ko yeiwa emkaam pyn katni khnang wow yada ya kiwa boon kiwa lai wa wan, kiwa kamai wei khamtam kiwa em hei kjut ha i doh i pran.
