Ka sorkar jylla hadien wa da yoo wa ka yakhih dang joor ko ha ri Bangladesh, kamtæ ynne i janmiet da chim ko ya ka rai wow pynkrehkam da Curfew miet ha waroh chi lynter ka khappood yong ka Meghalaya wa Bangladesh.
Hawa klam wa kiwa thoh khubor hadien ka yalang wa ki heh BSF kamjooh wa ki sahep sorkar ka jylla, u Symbood Montri Rangbah ka jylla uwa pait leh ya ki Kam Pohyung (Police), u Prestone Tynsong da ong wa kani ka rai man ko neibynta i myntoi yong ka jylla wei kamjooh yong ka ri.
Da khana u wa ka Curfew da rai wow pynkrehkaam nadooh myntu i janmiet heipor 6:00 waje hadooh mynstep 6:00 waje, man-ka-sngi hadooh wa da pynbna da kamwi won.
Da ong u leh wa ya ka Curfew da rai wow pynkrehkaam nadooh u paya namo Zero Point hadooh 200 meter cha i thaw yong ka Meghalaya.
Ini i rai ka sorkar jylla toh hadien wa da nang joor chooh chooh i yakhih heiwa du ynnin da em palat 90 ngut wa yap ha Bangladesh wei ynne da lai toor ki paidbah cha ka yung sah ka Prime Minister, ka Sheikh Hasina iwa da pynman ya ka wow hiar chuki wei wow ieh noh yei kaam kam ka Prime Minister heiwa da yut ko cha Tripura da ka Helicopter chipai deilang waka diah ko.
Discussion about this post