Ka Montri yong ka chnat i chait i khiah ka jylla, ka Dr. Mazel Ampareen Lyngdoh ynne ka sngi da pynbna ko wa ka sorkar jylla daw wanrah ko ya ka Cancer Mission wow yakhun pyrchah ya kani ka kjut ha ka jylla.
Ka Montri ha kani ka sngi da lai pait ko leh ya ka Cancer Wing yong ka Shillong Civil Hospital heiwa da yoh ko wow yasyllok wa kiwa kjut wei da yaklam ko leh wa ki heh ka chnat wa kamjooh ki Doctor kiwa pait ya kani ka thaw sumaar ya kiwa yoh Cancer.
Hawa yaklam wa kiwa pathai khubor, ka Dr. Ampareen da ong ko wa kani ka thaw sumaar da kreh bha ko wow sumaar ya kiwa chah ktah na kani ka kjut neibhah wa man ko kawi na ki kjut wa chim chiboon ki mynsien bru ha ka jylla.
Da ong ko wa i wanrah ya ka Cancer Mission toh wa kani ka kjut emkaam wow yakhun ya ka deiwa khor khnang wow ye u pyndoohjait ya kani ka kjut na ka jylla.
Neiliang ka Dr. Anisha Mawlong kawa man leh ka Senior Oncologist ha kani ka Hospital da batai ko yeiwa emkaam ha kani ka thaw sumaar, heiwa da ong ko wa katni kani ka thaw man ko kawa biang wow sumaar wei em 90 pyllong, heiwa da ong ko leh wa dang em kattu katni i duna wei dang hap wow pynbiang tangwa ym chong i du ha ka sorkar jylla neibhah ya ka Tender da leh da ka Tata Memorial Hospital na Mumbai.
Heijooh i por da ong ko wa ka thong ymtoh du wow sumaar ya kiwa da chah ktah na kani ka kjut, tangwa wow yada leh ya kiwa chong chnong na i chah ktah ha kani ka kjut, da pyntip ko wa kiwa boon na kiwa kjut ha ka jylla toh nei baam wei dih duma. Da ong ko wa ka thong toh wow pynlait ya ki khynroo wow lait ki u ngat ha i baam wei dih duma wei wow kiar ki na i mlien wa sih iwa ktah yei chait i khiah yong ki.
Katkam wa ong ka Dr. Mawlong, ka jylla Meghalaya em ko ha ka kyrdan wa ar yong i em ki chynrang kiwa yoh kjut Cancer wei ha ka kyrdan wa 11 na i em ki kynthai kiwa em ya ini i kjut ha waroh kawi ka ri India.
