Ka chnat saam bordiñ ka jylla Assam ka Assam Power Distribution Company Limited (APDCL) da pynbna paidbah ko wa neidaw wa duna mooyong ha ki thaw pynmih bordiñ deiwa thnag mooyong namo ki Thermal Generating Stations, daw wanrah ko yei hap pyndooh bordiñ, kamtæ da kyrpaad ya ki paidbah wym toh u pynlut phut hawa pynemkaam bordiñ.
Ini i duna mooyong da ktah ko ya ka thaw pynmih bordiñ wa tip kam ka National Thermal Power Project (NTPS) wa pynlai da ka Bongaigaon Thermal Power Project ha Salakati nadooh ka tayaw wa da dep kawa da e wow e bordiñ du 100 MW cha ka jylla.
Iwi na ki daw toh wa ha ki por wa joor slap duna i pynmih mooyong wa hap sai napoh ki paar mooyong wa em chapoh khyndaw wei heijooh i por ha kam kini ki por u mooyong wa pynmih leh ym man u uwa miat.
Ini da ktah ko leh yei emkaam bordiñ ha kini ki sngi wa em ka Durja Puja heiwa i emkaam bordiñ da ku cha palat 2,000 MW naka 1,600 MW wei da hap wow thied bordiñ na kiwi ki thaw hei dor wa T. 20 chi Unit katwa da dai won cha ki paidbah heri dor wa T. 7 chi Unit.
Neiliang ka Ministry of Coal won da ong kowa ym toh wow khuslai neidaw wa u mooyong wa da em chwa toh 72 Lak Ton iwa da biang neibynta 4 sngi heiwa ka Coal India Limited da em ko sa 400 Lak Ton kiwa daw saam cha ki thaw pynmih bordiñ.
Chooh chooh da kdaw wa hadooh u Naikhynde uni u snem da ku i pynmih mooyong da 24% wei i emkaam mooyong ha ki thaw pynmih bordiñ man ko 18.5 Lak Ton chi sngi wei da ye wow pynbiang 17.5 lak Ton chi sngi.
Da ong leh wa hanla joor u slap ha uni u snem, ki thaw pynmih mooyong ka CIL da ye ko wow pynbiang palat 255 MT u mooyong cha ki thaw pynmih bordiñ iwa man leh iwa boon dooh hadooh katni.
Ka CIL katni da pynbiang ko palat 15 Lak Ton u mooyong man-ka-sngi wei deiwa duna u slap daw ku cha ka 15 Lak Ton wei daw ku cha ka 16 Lak Ton manda kut uni u bnai.
Neiliang ka APDCL hadien ini won da ong ko wa dap hi i bordiñ wei ym toh u khuslai ki paidbah.
