Pynbna ka CoMSO yaki yakhih wow pyrchah yei pynslem ka sorkar pyrdi wow pynkrehkaam ILP

Shillong: Ka Confederation of Meghalaya Social Organizations (CoMSO) da pynbna ko yaka yakhih wa thymme ka wow sdang da ka chong kylleiñmynngor wa 5 sngi ka wow sdang nadooh ka 4 tarik u Thohlakhmi (Feb) yow pyrchah ya i pynslem ka sorkar pyrdi wow pynkrehkaam yaka Inner Line Permit (ILP) hapoh ka jylla.

Ya kani ka rai da chim haka yalang jhan wa pynman ynne ka sngi hadien wa u montri rangbah ka jylla u Conrad K Sangma da yachem u wa u Union home Minister u Amit Shah hajrong kani ka kaam.

Ka CoMSO da rai ko leh wow phah ki dkhot yong ka yow yarap yaka Directorate of Infiltration ka sorkar jylla yow pait yei psiah i wan kiwa na baar.

U Chairman ka Confederation u Robertjune Kharjahrin da pyntip u cha ki laad pathai khubor wa kani ka yakhih u pynman ha Shillong nadooh ka 4 tarik hadooh ka 8 tarik u bnai wow wan nadooh 2 waje i sngi hadooh 5 waje i janmiet wei yei thaw daw pyntip ha ki sngi wow wan.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U Kharjahrin da ong u kattu da dap 2 bnai nadooh wa ka dorbar ki MLA ka jylla da chim ki yaka rai wow dawa yaka sorkar pyrdi wow pynkrehkaam yaka ILP.

Da ong u leh wa kani da man ko ka sien wa soo wa ka sorkar pyrdi ym burom ko yei dawa ka sorkar jylla wow wanrah ya ki aiñ wow yada ya ki jaitbru ri-loom ka jylla. Da ong u wa nyngkong toh hadien wa sorkar jylla da mynjur ko yaka Residential Permit Bill ha u 1973 tangwa u President ka India ym bien u wow e yaka muhor yong oo.

Da jia leh i jooh yaka Meghalaya Employment Bill ha u 1983 waka Cabinet Committee on Public Grievances’ yow wanrah ya ki le jait ki Identity Card ha u 2006 kawa ym yoh yei mynjur naka sorkar pyrdi.

“Ini da pynsñiaw ko ya i wa em i thmu ka sorkar pyrdi wym kwah ko wow yada yaka jylla wa ya ki jaitbru tre jylla,”da ong u Kharjharin.

Da ong u leh wa ka CoMSO u pteiñ ko wow pyrchah yei wan ki montri ka sorkar pyrdi chapoh ka jylla.

Da kam u leh wa i wan psiah tooh ki nong Bangladesh da ku i nadooh wa em ka Citizenship Amendment Act, 2019 wei na ini i daw da rai wow yarap yaka Directorate of Infiltration yow kdoh u khoom yeini.

“Daw thoh i cha ka Directorate wa i man i kiwa da pynkhreh wow yarap ha waroh ki Infiltration Check Gate deiwa pyrkhat yei duna bru ka Directorate wow leh ya ini i kaam,” da ong u.

Da kyrpaad u leh ya ki paidbah wow ya krehlang deiwa ong wa i yakhih dawa ILP man ko ka yakhih paidbah.