Kam chibynta wow pynkhreh ya ka Election MLA 2023 kawa daw man ha ka 27 tarik u Thohlakhmi, ka Dorbar Chnong Ialong leh da pynmih ko ya ki kyndon neibynta i wan yalap Election ki kyrtong ha ka chnong kiwa rap phær na kiwi ki chong kiwa da dep pynbna.
Ha kani ka kynti wa man leh ka sien wa nyngkong dooh ha i parom ka Dorbar Chnong Ialong, da pynbna ko ya ki kyndon wow hap bood ki kyrtong hawa wan yalap hapoh ka chnong katkam i rai yong ka Executive Committee ka chnong kawa da man ha ka 27 tarik uni u bnai ha yung krehkaam u waheh chnong kiwa man leh kam chibynta wow pynneh yei chongsuk chongsaaiñ wa i khooid i jngiar hapoh ka chnong heipor yalap Election deiwa booh yaki kyndon heiyatoh wa ini i kaam kiwa man kamni ha wah:
U kyrtong ye u wow wanrah ya kiwa kyrchaan yong oo kamwa jooh man ha ki por nachwa wa kynthup ya kiwa na baar chnong katkam ki kyndon wa da kdaw da ka dorbar chnong khnang wa ki khon ka chnong u ye ki wow ap ya ki yurim wa u kyrtong kwah u wow pynsñiaw cha ki.
Ka yalap Election u e laad wow sdang ya ka nadooh 7:30 i miet katkam ki tarik wa daw pynyoh ya ki kyrtong, i por wow pynkut wan u man ko katkam i por wa da booh da ka sorkar.
Ya ka yalang daw pynlai da ka dorbar chnong da u bru wa da booh da ka chnong wow man kam u chongknor namo u Chairman.
Kiwa klam man ki kamni: (1) U Chairman (2) Uwi uwa kyrchaan ya u kyrtong uwa man u tre chnong (3) Ar ngut kiwa kyrchaan ya u kyrtong kiwa na baar chnong wa u (4) U kyrtong (Candidate).
Ya ka yalang u pynkut da u Chairman.
Da khang pyrchah wow yalap Election da ka poisa, lada chem ya kiwa leh pyrchah daw pynchitom katkam ki aiñ chnong heijooh i por daw e kti cha ki bor wa ha khlieh.
Da khang pyrchah ya kiwon kiwon wow tem sur Election lane kiwi tawon ki jait sur hapoh chnong palat ya ka 10:00 waje i miet.
Da khang pyrchah ya ki kari wa na baar wow psiah chapoh chnong palat ya ka 10:00 waje i janmiet ha kini ki por Election nadooh ka 21-02-23 lait noh na ki kaam wym hoi u dam (Emergency).
Da khang pyrchah ya kiwon kiwon kiwa pynhær kari hapoh chnong palat ya ka Speed Limit wa da booh kawa 20 km/h.
Daw wai du kawi donhi ka luti wow psiah chapoh chnong katwa kawi tawon ka luti wow mih napoh chnong nadooh ka 25-02-23 kiwa man kawa kdaw ha wah:
Entry Point– Phrang Dukan Cha (yong Pale).
Exit Point– Madan Pastieh Ialong.
Da kyntu ya waroh ki Political Party kiwa daw pynman yalap Election ha ka chnong Ialong wow man ki kiwa ya krehlang heijooh i por wow pynman ya ka thaw yalap Election kawa khooid hadien ka yalang.
Ini toh katkam ka Wyrta na u Waheh Chnong ka Dorbar Chnong, Ialong.
