Ka Meghalaya Boxing Association (MBA) da jied ko ya 9 ngut ki rangyakura ki wow ya chimbynta ha ka 7th Elite Men’s National Boxing Championship kawa daw sdang nadooh kani ka 25 tarik.
Ya kani ka lympung kawa daw wan chimbynta palat 350 ki rangyakura ha ki 13 tylli ki kyrdan yakura waphær waphær, daw pynman ha SAI Indoor Stadium kawa em ha NEHU nadooh ka 25 tarik hadooh ka 1 tarik u Kmaichonglad (Dec), 2023.
Ya kani ka rynsan yakura daw pynman da ka MBA waka Boxing Federation of India (BFI) heiwa da kyrchaan poisa da ka chnat Sports and Youth Affairs yong ka sorkar jylla.
Ki rangyakura ka jylla toh u Sanjeev Maskut (46-48kg), u Banjop Nongkhlaw (51-54kg), u Melvin Marbaniang (54-57kg), u Kordor Marwein (57-60kg), u Badonkupar Synnah (60-63.5kg), u Bhalang Shadap (63.5-67kg), u Balnas Sangma (67-71kg) wa u Justerwell Jyrwa (71-75kg). Katwa ki Coach ka Meghalaya toh u Pynskhem L Nonglait, u Wilfred Kharmawlong wa u Noyontho Marak.
Kini kiwa da chah jied toh kiwa da chimbynta ha ki lympung yakura waphær waphær heiwa da man ki leh kiwa jop ha ki lympung yakura hapoh ka jylla hadooh cha baar wei kattu hap ki wow pynyoo yei sap yong ki pyrchah ya kiwa yakura kiwa da dep yow takma haka National Games, Asian Games wei kamjooh haka Commonwealth Games.
Ki kattu katni kiwa bna naam kiwa daw wan chimbynta toh uwa da yalehke ar sien ha ka Olympics wei uwa da yoh takma la ynru sien haka Asian Championship, u Shiva Thapa, kamjooh u rangyakura uwa da khur naam jop haka Asian Games 2018, u Amit Panghal wa u rangyakura uwa da khur takma tama haka Commonwealth Games 2022, u Rohit Tokas najrong kiwi kiwi de.
Kam wow khana heini wa ka BFI da pynkhreh ko wow pynman yei e sikai ha u snem wow wan neibynta wow pynkhreh yaka Paris Olympics 2024, tæ wei kani ka lympung man ko kawa kongsan neibynta kiwa yakura. Kamtæ neiliang ka MBA waka chnat Sports and Youth Affairs daw yaleh ki katwa ye yow pynman ya kani ka lympung kawa jop.
Discussion about this post