Ka sorkar Mizoram ynnin ka sngi da pynbna ko da ka Lockdown wa 8 sngi ha Aizawl wa kiwi ki District Headquarter nadooh mynstep ka 3 tarik hadien wa ku ma ku kiwa dang yoh COVID-19 heiwa ha kini ki 24 kynta da em 168 ngut kiwa dang yoh thymme.
Ha ka hukum wa pynmih da ka Mizoram State Disaster Management Authority, da rai wow pynkhor ya ki kyndon deiwa pynkrehkaam da ka Lockdown yow khang yei lai i wan ki bru, ki kari lait noh kitu kiwa lai yei kaam wym hoi u dam yow ye u pynduna yei ku ka khlam.
Ka Lockdown toh kawa daw krehkaam nadooh 4 waje i step kani ka 3 tarik hadooh 4 waje i step ka 11 tarik uni u bnai.
Da em 11 tylli ki District ha Mizoram wa kynthup lang ya ka Aizawl heiwa ha kiwi leh ki District Headquarter da phah ya ki bru wow chong ki hapoh yung, i psiah wa i mih naka jylla leh toh iwa da booh da ki kyndon kam ki leh Test leh Quarantine wa kiwi kiwi.
Da pynkrehkaam leh ya ka Night Curfew nadooh 7:00 waje i miet hadooh 4:00 waje i step.
Da phah khang leh ya waroh ki thaw puræ, ki yungmane, ki Restaurant, ki dukan wa kiwi kiwi kamjooh da khang leh wow pynman ya ki yalang paidbah ha ini i por wa em ka Lockdown.
Neibynta ka Aizawl wa kiwi ki District Headquarter ki dukan wa dai ya ki marbaam nadooh ki doh, ki jhoor, ki tiar chna yung wa kiwi kiwa emkaam u wai ki ha ka Monday, Wednesday wa Friday donhi.
Ha kiwi won ki bynta ka jylla ym em khang yei wai ki dukan wa kiwi ki kaam khayi pateiñ.
Kam wow pynkynmoo wa ha kani ka kynti, nyngkong da phah khang chwa ya ki District Headquarter 7 sngi nadooh ka 20 tarik u bnai wa dep deiwa ym em pynkhor ya ki kyndon wei ym khut leh yei khang kam ka Lockdown.
