Yow e laad ya ki bru paidbah wow yoh ki yei yarap heiyatoh wa ka aiñ ha kini ki por wa wan ka la-ær wa ar ka khlam COVID-19, neiliang u Member Secretary, Meghalaya State Legal Services Authority (MSLSA) da pynbna paidbah u wa yei ki wow Phone deiwa mynkna ha ki Toll Free Number 1800-345-3662, 9089392382, 9615573442 wa 9774180179 wei ye leh wow phah email ha [email protected].
Kam wow kdaw heini, ya ka aiñ Legal Services Authorities Act, 1987 da pynkrehkaam da ka Parliament yow e bor ya ka Article 39-A ka Constitution ka ri kawa kular wow e yarap mynkna heiyatoh wa ka aiñ cha kitu kiwa tlot ha ka imlang sahlang yow lait ki wow dooh yei hok yong ki neidaw wa man ki kiwa dooh wei kiwa em i duna.
Katkam ka Section 6 ka Legal Services Authorities Act, 1987, ka sorkar Meghalaya da sdang ko ya ka Meghalaya State Legal Services Authority (MSLSA) ha u Naiynñiaw 1998. Ka yung krehkaam ka MSLSA kattæ da em ko ha ka Additional Secretariat, Shillong ha wah ka MATI Building.
Yow pyntikna wa i thong yong ka aiñ u man sakhiat ki katkam wa da booh haka riti synchaar ka ri yow pynhun leh ya ki bru ka jylla, ka MSLSA da jooh e ko yei yarap na ki por cha ki por wa ki kaam wa yatoh ki aiñ wei lyngba kini ki Helpline kiwa katni, hapyrdi ka la-ær wa ar ka khlam COVID-19 da yooluti wa ha kani ka kynti leh daw ye ki wow pynypoi yei rap cha kiwa emkaam sakhiat yei yarap yow poi cha ka thong wow yoh yei bichaar wa hok cha waroh.
