Ka Serum Institute of India (SII) haka kyrwoh wa phah da pyntip ko wa da pdiang sñiawbha ko yei pynbna ka sorkar India lyngba ka Ministry of Health wa Finance Ministry yow pynkhlan pynboon yei pynmih kamjooh yei e ya i dawai yada COVID-19.
Kamtæ ha kini ki ar bnai wa daw wan daw pynboon yei pynmih dawai heiwa 50% na i dawai wa pynmih daw e cha ka sorkar India yow ye ko u pyndep yei thong yong ka wow e dawai tika cha kiwa toh u yoh katwa ka 50% won toh daw booh neibynta ki sorkar jylla wa ki Hospital ki bru samen.
Kamtæ i dor i dawai COVISHIELD wa pynmih da ka SII hi u man i T. 400 chisien e neitbynta ki sorkar jylla wa T. 600 cha ki Hospital ki bru samen.
Heiyatoh won wa ki dawai wa pynmih na kiwi ki ri ka pyrthai, ha ki yaw ki haat daw dai hapoh T. 1500 kiwa pynmih na America, hapoh T. 750 kiwa pynmih na Russia katwa kiwa pynmih na China leh u man i hapoh T. 750.
Neidaw won wa chitom wow pynpoi cha waroh kiwa kwah u thied, kamtæ da phah ya ki Hospital ki bru samen wow thied ki ya ini i dawai na ki sorkar jylla wei hadien 4-5 bnai daw ye wow pynpoi ya ki dawai cha ki yaw ki haat.
Ini da man i leh hadien wa da pynbna wa kiwa em 18 snem chaneiñ leh ye ki wow yoh ya ini i dawai nadooh u bnai wow wan heiwa da antaad wa kiwa em 18 hadooh 44 snem toh kiwa hap dei su yow yoh ya ini i dawai katwa kiwa em 45 snem chaneiñ daw lai bait kamwa da leh chwa wa daw yoh ki deiwa mynkna heiwa ka sorkar pyrdi da dep booh kyrpang ko ya ki bru wa em 45 snem chaneiñ toh u yoh ki yeini i dawai neidaw wa man ki kiwa em hei maa wow yoh ya u khñiang COVID-19.
