Ka sorkar MDA- II ynne ha ka yalang yong ki Montri da pynbna ki yei pyrtuid yong ki 5 ngut ki dkhot ka Expert Committee ki wow bichaar bniah yei pynbait thymme ya ka State Job Reservation Policy wei ha kani ka Committee da em 2 ngut ki bru chemphang wa sikai ha Shillong, katwa 3 ngut toh kiwa na kiwi ki jylla.
Ka Montri kawa man leh kam kawa e ktien yong ka sorkar, ka Dr. M. Ampareen Lyngdoh da khana wa ya kani ka Committee daw khlieh da u Justice (Retired) Mool Chand Gargh uwa man uwa bichaar warim ka Madhya Pradesh High Court kam u Chairman wei ki dkhot u kynthup ya u Justice (Retired) Dr. Satish Chandra uwa man uwa bichaar warim ka Allahabad High Court, u Prof. D.V. Kumar uwa na ka Department of Sociology NEHU, Shillong, u Prof. Chander Shekhar uwa na ka Department of Fertility and Social Demography IIPS, Mumbai wa u Prof. Subhadeep Mukherjee uwa man u Assistant Professor of Economics & Public Policy IIM, Shillong.
Ka Montri kawa man leh ka Chairperson yong ka Reservation Roster Committee da ong ko wa i kaam yong kani ka Committee toh wow puræ bniah ya ka Reservation Policy kawa katni yong ka jylla wei wow phah e yumut hawa yatoh wow pynbait thymme.
Da ong ko wa kani ka Committee daw yachem ko leh ya waroh kiwa embynta wei wow ap yei kwah wei e yumut wa kynthup ya ki seiñ saiñpyrthai, ki seiñbhalang, ki seiñ kreh mon sñiawbha wa kiwi kiwi kiwa ye wow e yumut.
Hawa kylli yei wym kynthup ya ki tre chnong tre jylla wow em ha kani ka Committee, ka Montri da ong ko wa i wym thung ya ki tre chnong kiwa man ki Khasi, Jaiñtia næ Garo toh yow lait nei leh chilliang.
Chooh chooh da khana wa da booh por ya ka Expert Committee wow pyndep yei bichaar wei e yumut hapoh ka chi snem.
Kam wow pykynmoo wa i thung yong ka sorkar ya ka Expert Committee da man ko hadien wa da mih i dawa wa joor wow pynbait thymme ya ka aiñ bhah kaam næ ka State Job Reservation Policy yong ka jylla.
Discussion about this post