Ka sorkar Meghalaya da pynbna ko ya ki kyndon heiyatoh wa i lehkmen Puja yow yada nei poor ka khlam COVID-19 iwa da pynkreh deiwa ya pynbait wa ka Central Puja Committee (CPC) heiwa ym chah ya kiwa em 65 snem chaneiñ, ki bru wa em chwa i chitom, ki kynthai wa punkhon wa ki khynnah kiwa da phah wow neh ki ha yung. Katwa ki bru wa da dep yoh ya waroh arsien i tika ye ki u chimbynta ha ka lehkmen Puja.
Da phah leh ya waroh kiwa pyndep ya ka lehniam, ki dkhot ka CPC, kiwa yarap, kiwa choh bom, ki Volunteer wa embynta ha ka lehkmen Puja wow man ki kiwa da dep yoh tika.
Heiyatoh wa i chna Pandal, toh u man ki kiwa pyngngad ym toh kiwa tymmoh khlup wei toh leh u booh jar jiar i thaw psiah thaw mih. Hap leh wow booh ya ki dawai sait kti namo ki Sanitizer Dispensers lane ki thaw sait kti wei lada ye wow booh wa ki tiar thaw chit ya ki bru.
Toh leh wow yabhah yei por wa chah u psiah ki bru chapoh Pandal yow lait nei khynnia wei ki bru ym toh u em ki palat 50% na iwa hoi u em hapoh Pandal. Waroh ki bru toh u sap Mask ki ha waroh ki por.
Toh leh u pynkhreh ya ki kari yow kit ya kiwa chitom lane kiwa yoh ya ki dak wa chitom.
Toh u pynbna paidbah leh wa toh wow lai paitke du ya ki Pandal wa em ha ki jar jiar ki dong wei wow yait u lai paitke ya kiwa em cha kiwi ki dong.
Lada em kiwon kiwon kiwa dang chah ktah ha u COVID-19, kiwa man kam ki High Risk Contact lane kiwon kiwon kiwa wan na ki Containment Zone wa poi cha ki Pandal, daw chah pynchitom ki katkam ka aiñ.
Ka Puja Committee da rai ko leh wa ya ki dur Blai wow chna ym toh u jrong ki palat 5 phut wei ym chah ya ki para wa ngait wow tba ki.
Heiyatoh wa i noh Blai, ki Puja Committee deiwa ya krehlang wa ki DC lane ki SDO (Civil) daw pynbait ki kammon wow leh wei katwon tylli ki Blai wow chah u pynngam um.
Ym chah leh wow pynman ya ki lai paidbah hepor wa li noh Blai.
Ya ki Puja Committee wa rah lang wa ki dur Blai, u chah wow em du 20 ngut ki dkhot deiwa pynemkaam ya ar tylli ki kari khian wa kawi ka kari heh yow bood ya i dur Blai cha i thaw lai noh.
Ki Puja Committee won ki wym em rah Blai yow lai noh, u chah du 9 ngut ki dkhot deilang wa 2 tylli ki kari khian.
Heiyatoh wa ka Sandhi Puja, u chah wow pynman ha ka 13-10-21 hapyrdi i por 10:30 i miet hadooh 12:30 i step synyaw deilang wa i choh bom kattu katni minit donhi.
