Shillong: Neidaw wa em wa yoh COVlD-19 kamjooh ki bru wa em hei maa wa ye u yoh ya uni u khñiang wei yow ye u leh yei booddien, Quarantine wa kiwi kiwa emkaam yow yada ya ki paidbah, ka District Magistrate, East Khasi Hills District, da pynmih hukum ko haka 4th August, 2020 yow pynbna yei yung ka Mandalyn Lyngdoh Mawnai waka Albinia Lyngdoh Mawnai ha Malki Chinapatty, i yung u Martian Mawthoh ha Riat Bharat, Malki Nongshiliang wa i yung ka Pynhunlang Lyngdoh ha Lower Lummawrie kam ki Containment Area yow khang yei lai i mih wa khlem yoh bor.
Kani ka hukum da ong ko wa waroh ki bru paidbah ym chah wow psiah ki cha kini ki thaw wei ki bru wa em hapoh kini ki thaw toh u neh bait ki hapoh ki yung.
Da khang wow pynman ya kiwon kiwon ki yalang paidbah kamjooh waroh ki dukan toh u man ki kiwa khang deilang wa ki yung krehkaam sorkar kamjooh yong ki bru samen.
Yei thied ya ki mar wa emkaam hadooh ki dawai dachin daw yarap da ki bru ka District Administration.
Kani ka hukum ym em khang ko ya ki bru wakreh ka chnat i chait i khiah, Shillong Municipal Board, ki laad pathai khubor, Petrol Pump wa kiwa lai booh tadong LPG.
Ya kiwa yaleh pyrchah daw pynchitom katkam ka aiñ Disaster Management Act, 2005 waka IPC.
