Ka Voice of the People Party (VPP) da pynbna ko ya ki pyrtuid yong ki kyrtong ha ka thup wa nyngkong, wa kynthup ya u MLA warim ka Nongkrem uwa man u President ka Party, u Ardent M Basaiawmoit deilang wa 13 ngut kiwi won.
Ki kyrtong wow yakhun ha ka Election MLA kawa daw man ha u snem 2023 kynthup ki ya u Damewanhi L Rymbai na Khliehriat, u Dr. Ricky A J Symgkong na Umsning, u Heavingstone Kharpran na Mawryngkneng, u Brightstarwell Marbaniang na Mawlai, u Avner Pariat na East Shillong, u Raja Jyrwa na West Shillong, u Danny Langstieh na South Shillong, ka Aibandaplin F Lyngdoh na Mylliem, u Winston Tony Lyngdoh na Nongthymmai, u Ardent M Basaiawmoit na Nongkrem, u Dorisstar Marbaniang na Mawphlang, u Manbhalang Thabah na Pynursla, u Shanlang Warjri na Mairang wa u Overlin Imïong na Ranikor.
Neiliang u Kara Chen uwa man u Chairman ka State Election Committee yong ka VPP da ong u wa kni ki pyrtuid toh kiwa em ha ka thup wa nyngkong wei i pyrtuid kiwa em ha ka thup wa ar daw pynbna won hadien. Hawa kylli da khana u wa hadooh katni dang du uwi uwa dang man MLA uwa da yaklam wow yakhun naka VPP, utæ toh u Adelbert Nongrum u wow yakhun na North Shillong.
Hawa kylli lada ka Party ka em ko i thmu wow ya krehlang hadien ka Election, uwa e ktien ka VPP, u Prof. Batskhem Myrboh da ong u wa kamwa ka seiñ da jooh klam wa kani ka sorkar em ko boon ki pynbaad baam tooh, emkaam wow e laad ya kiwi ki Party ki wym em ha kani ka sorkar wow synchaar, tangwa da pynrap u itæ chong hei stat yong ki paidbah kiwa jied.
Da ong u wa lada yoh chna sorkar wa kawon kawon ka Party leh, ka VPP daw booh ko hakhmat dooh ya ka yurim yong ka Party, wei lada hap wow pynyabi ha ka sorkar daw man leh hajrong ki phang ym toh neibynta ka chuki Montri.
