I poor u khñiang kjut wa tip kam u Mpox ha ka ri Congo wa kiwi ki thaw ha Africa, da pynman ya ka World Health Organization (WHO) wow pynbna ko da ka Global Emergency yow leh ki ri yeiwa emkaam yow yada na uni u khñiang.
Ka ri Sweden leh da pyntikna ko yeiwa em uwa nyngong wa yoh ya uni khñiang iwa da pynkuslai neibhah uni u khñiang toh uwa jooh chem cha Africa donhi tangwa uwa yoh ya uni u khñiang toh uwa dang wan na Africa.
Ini da pynkuslai ko ya kiwa boon boi ini ye ko wow man kamwa sdang biang ya ka khlam hapoh pyrthai namo ka Global Pandemic kamwa da jia heipor u COVID-19 tangwa uni u Mpox ymtoh uwa ye u poor lyngba ka la’ær tangwa deiwa ya tba næ deiwa yabi sniehdoh hadooh deiwa tba ya ki that ki nep kitu kiwa yoh ya uni u khñiang.
Uni u khñiang toh uwa ktah yei sniehdoh deiwa ad kha, iwa chi rukom pyntieñ ko ya kiwi wow tia chajan.
Ha Europe da pynbna ki wa ye u em kiwi kiwa daw yoh chooh ya uni u khñiang da kiwa wan na Africa tangwa ym em da khuslai neibhah ym em antaad ki wa daw poor smat u.
Uni u Mpox ha u 2022 da poor u wei da ktah u ya 70 tylli ki ri tangwa du hapoh kattu katni bnai da yei wow kdoh u khoom yei poor u tangwa kattæ hawa poor u ha ka ri kam ka Congo kawa dooh bha, da pynman leh wa 96% kiwa yap na uni u khñiang toh na kani ka ri.
Ka Pakistan leh da pynbna ko wa da em wa yoh ya uni u khñiang ha ka 15 tarik wei kamwa man kattæ waroh ki ri wa da em wa yoh ya uni u khñiang toh ka Rwanda, Pakistan, Sweden, The Democratic Republic of Congo, Kenya, Uganda wa Burundi.
Ha India kamwa man kattæ ym em wa yoh ya uni u khñiang nadooh wa sdang poor biang u uwa jooh tip nachwa kam u Monkeypox wei uwa poor na ki mrad cha ki bru. Da khut ya oo nachwa kam u Monkeypox toh neidaw wa chem nyngkong ha ki chrieh tangwa kiwi ki mrad leh em ki oo.
Iwa khuslai donhi toh wa ya uni u khñiang ym pu em dawai wow sumaar ya kiwa chah ktah.
Discussion about this post