Shillong: Ka State Election Committee yong ka HSPDP kawa da man ynne ka sngi da pynbna ko ya ka thup wa nyngkong yong ki pyrtuid ki kyrtong ka seiñ ki wow yakhun ya ka MLA Election ha u 2018.
Ha kani ka thup wa nyngkong ka seiñ da pynbna chwa ko du neibynta ki 10 tylli ki Constituency katwa ya ki wa dang sah won daw pynbna won hadien.
Ki pyrtuid yong ki kyrtong wa ki Constituency man ki kamni hawah:
Rambrai-Jyrngam Constituency: Phlastingwell Pangniang, uwa man leh kam u MLA wa katni yong kani ka Constituency.
Mawshynrut Constituency: Witting Mawsor, uwa man kam u MLA wa katni kani ka Constituency.
Nongstoin Constituency: Diosstarness Jyndiang, uwa man kam u MLA wa katni yong kani ka Constituency.
Mawthadraishan Constituency: Ka Biolinda L. Nonglait wada pyndep ya ka Master on Social Work na Kristu Jayanti College Bangalore. Jooh kreh ko kam ka Social Worker neibynta ka DBT Project ha Civil Hospital wei hadien kam ka Project Coordinator yong ka Community Based Rehabilitation Programme ka KJP Synod Sepngi ha kiwa boon tylli ki chnong ha thaiñ Mairang.
Sohiong Constituency: Samlin Malngiang, MDC yong ka Sohiong- Nongspung.
Mawphlang Constituency: Pynshai Manik Syiem, uwa da jooh man kam u MLA wa u Montri Sorkar dang nachwa wei kam u MDC.
Mylliem Constituency: Ka Teilinia Thangkhiew, MDC Mylliem wa ka kynthai wa nyngkong dooh wow ksoh ya ka chuki Chairman ha KHADC.
Mawkynrew Constituency: Martle. N. Mukhim,uwa jooh man kam u MLA wa Montri Sorkar warim ka sorkar jylla.
North-Shillong Constituency: Alester Neville Diengdoh, uwa 41 snem i rta uwa na Riatsamthiah. Uni u waheh toh u muktiar yong ki District Court wa Meghalaya High Court. U Alester da pyndep u ya ka LLB na ILS Law College Pune wei da pyndep u ya ka Diploma in Human Rights & Law na ka jooh ka College. Da jooh em bynta u wa ka National Human Rights Commission, wa kiwi kiwi wei da man u leh uwi na kiwa yaleh wow wanrah wei wow pynkrehkaam ya ka aiñ RTI ha ka jylla.
Sutnga-Saipung Constituency: Defender Pakem, u khynroo uwa da pyndep ya ka LLB na North-Eastern Hill University, Shillong.
Discussion about this post