Ka sorkar Meghalaya da pynbna ko wow booh syndon 7 tylli k Border Outpost (BOP) kiwa em 2 tylli ha West Jaiñtia Hills, 3 tylli ha West Khasi Hills wa mar kawi ha East Jaiñtia Hills wa ha Ri-Bhoi.
Kini toh ka Mukroh BOP wa Tihwieh BOP ha West Jaiñtia Hills, ka Mooriap BOP ha East Jaiñtia Hills, Ka Rani-Jirang BOP ha Ri-Bhoi, ka Umwali BOP, ka Lejadubi BOP waka Langpih BOP ha West Khasi Hills wei yeini da pynbna da u Montri Rangbah ka jylla ynne ka sngi hadien wa kut ka yalang ka dhab ki Montri namo ka Cabinet Meeting.
Da khana u leh wa ka sorkar da rai ko wow pynku kyrdan ya ki ar tylli ki Out Post, kawi ha Patharkhmah, Ri-Bhoi wa kawi ha Kyrshai, West Khasi Hills. Heiyatoh won wa i booh ya ka Out Post ha Block-II, Ri-Bhoi District, da pyntip u wa dadep phah ya u DGP wow lai pait chwa u yei thaw.
I lut wow booh ya kini ki Border Outpost man ko T. 2 klur chi snem, ki Outpost won kamwa T. 1.5 klur chi snem wei neibynta ki 7 tylli kiwa da pynbna, i lut man i T. 14 klur chi snem.
Hawa kylli lada pyrchah ka sorkar Assam yei booh ya kitai ki BOP, u Conrad da ong u wa kini toh kiwa em bait hapoh u pood u ang Meghalaya wei lada em i pyrchah, ka Meghalaya daw pyrchang ko wow yaklam lada em kam kitæ wei daw pynsñiawthooh leh ya ka Assam wa toh wa emkaam wow booh neibynta u wanrah yei chngaaiñ ya kiwa chong chnong khappood.
