Pynbna u Ardent da ka yakhih ‘Ïada la ka Ri’ yow pynyatylli ya waroh neibynta ka mynried

Shillong: Ka yalang paidbah wa da khut da u MLA warim ka Nongkrem, u Ardent Miller Basaïawmoit kawa man ynne ka sngi ha Madan Student, Jaïaw da pynbna da ka yakhih paidbah pyrchah ya ki aiñ ka sorkar pyrdi, wei da e pyrtuid ya kani ka yakhih da ka ‘Ïada la ka Ri’ wei i thmu yong kani ka yakhih toh neibynta ka mynried ki pateiñ wow wan.

Ha kani ka sngi, u Ardent da pynbna u leh wa hachwa wow lai chakhmat ya ka yakhih daw yaklam u wow paan kyrchaan na waroh ki dorbar chnong, kani ka yakhih daw lum ko wow pynyatylli ya waroh ki seiñbhalang du hapoh kawi ka lama ‘Ïada la ka Ri’ wow rah ya ka sur cha Delhi, kani ka yakhih daw booh ya ka jaitbru hakhmat khlem da phiah da ka niam. Ha kani ka yalang u Ardent da yah u leh wow e wyrta da iwi i sur neibynta wow pyntylli ‘Para Khasi’.

Hawa klam ha kani ka yalang paidbah, u Ardent da khyrwait u yaka sorkar jylla deiwa pynbaad wa ka pynbiej paidbah ko hajrong ka Inner Line Permit (ILP), katwa u montri rangbah, u Conrad K Sangma da pyndem tdong u hakhmat u montri kaam pohyung, u Amit Shah wei kohngooh hawa phah u ya ki wow lehkhmen Christmas chwa yow yaklam ya ka ILP hadien.

Da beiñ u leh ya ki MLA ka jylla Meghalaya kiwa khlem yieñ pyrchah hawa ka sorkar India pyndam ko ya i kyntien Khasi-Jaintia na ka Bengal Eastern Frontier Regulation, 1973. Deiwa pynrap wa katni manda dep pyndam, pyrkhat ki wow yoh ya ka ILP deiwa sdang ki wow khih klang biang wow dawa ya ka ILP.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da beiñ u leh ya u Conrad Sangma hajrong ka Citizenship (Amendment) Act (CAA), wa na i por cha i por ong u wa ka sorkar jylla pyrchah ko yaka CAA, katwa ya ka Agatha Sangma da phah u wow kyrchaan ya katai ka aiñ ha Parliament, tangwa ki MLA Khasi won put turoi ki wa u montri rangbah da chimkhia bha u.

U MLA warim da ong u leh wa ka jylla Meghalaya ka emkaam ko yaka Article 371 khnang wa ki aiñ wa chna da ka sorkar pyrdi kiwa ktah ya ki paidbah ka jylla wym ye ki wow krehkaam.

U Ardent da pynbna u leh wa kani ka yakhih u man ko leh pyrchah ya ki kaam bamtooh. Da pynbaad u wa ka khayi mooyong pyrchah yaka aiñ toh deiwa tip lang ka chnat kaam pohyung (Home) wa ka chnat Transport yong ka sorkar jylla, wei ki montri sorkar wa ksoh ya kini ki chnat toh u jubab ki.