Ka seiñ Ri-loom wa tip kam ka People’s Democratic Front (PDF) ynne ka sngi da sdang ko u kaweh lama hapoh ka 3-Raliang Constituency lyngba u kyrtong yong ka uwa naka chnong Nangbah, West Jaiñtia Hill District, u Shemhok Garod u wow yakhun yaka Election MLA ha u 2023.
Haka yalang wa da pynman ha pchem yung u Shemhok hi da sakhi wa ki paidbah wa boon da mih ki dei kmen dei chongchit wow pdiang sñiawbha ki ya kani ka Party wei e khublei pyn-ehbok pyn-ehnasib ki leh ya u kyrtong yong ka u Shemhok Garod, hei emlang u Banteidor Lyngdoh, Montri ka sorkar jylla uwa man leh u President ka PDF, u J. Basaiawmoit, Vice President PDF, u Dolloi ka Elaka Nangbah, u RM Garod, ki bru waheh naki chnong wapher wapher wa kiwi.
Ha kani ka sngi u Moon Dhar uwa da yieñ ini wadep kam u kyrtong MLA uwa naka chnong Nangbah hi, da lai kyrchaan noh u ya u Shemhok Garod deiwa ong i daw hi toh wa yoo u ka thong i jop em ko cha u Shemhok.
U Shemhok Garod hawa klam ha kani ka sngi khana u wa oo hi deilang wa u Moon Dhar da em ki i yatylli neibynta u kreh chitom lang yow pynjop yaka Party PDF na kani ka Constituency, neibhah yoo ki wa kani ka Constituency da chah ieh khonswet ko ha kiwa boon ki liang khamtam ka chnong Nangbah la kamwa 15 snem kattu.
Heiyatoh wa i chah khanglaad u ha ki bor chnong wow pynman yalang ha madan Presbyterian, ong u ini ym jooh jia i mynnu mynnu hapoh Nangbah tang nadooh wa wan ka Party BJP hapoh chnong te mih itæ i emkaam paan bor.
“I beh ki nga na katai ka thaw mut ki jan u dooh nong O, han pyn ynnin miet da boon ki lok wa Phone nga napoh Presbyterian kiwa ong sñiaw wyrai wa chah beh mi, heithaw wow dam me u kyrchaan leh tang ha kani ka kynti hap kyrchan bait ya me neidaw wa yoo wyrai ya me wa chah lehbeiñ mi ha katu ka por,” khana u Shemhok.
“Hao ste i man i ki rit ki ria tangwa ki khian leh em ki ka bor neibhah ka sorkar e ko kajooh ka hok u yaleh Election kamjooh u thap Vote, wei lada man u khynnah chare masi, uwa heh kyrdan, uwa mahajon tam leh ka Vote toh du kawi don,” da ong u Shemhok.
Hawa kyntu won u yaki paidbah wymtoh u teiñ sar ki hawa em ki heh spah wa wan pyntieñ, ong haroh u wa kamwa jooh ong u wa oo yieñ yaleh u neibynta u duk u suk lada poi thong u daw yaleh u wow pynku ya kiwa dooh katwa kiwa mahajon u neh chwa ki kamjooh khnang yow ryngkat kyrdan kiwa dooh wa kiwa mahajon.
Neiliang u Banteidor Lyngdoh hawa pynbna paidbah wa u kyrtong PDF naka 3-Raliang Constituency toh u Shemhok Garod, ong haroh u wa u 2023 toh ka pali wow synchaar da ki Party Ri-loom yaka jylla.
Hawa kam wa ka Party PDF toh kawa da leh chiboon neibynta ka jaitbru, khana haroh u wa heipor wa kani ka Party hiar ko cha Mukroh nei jia chah siat yap ki 5 ngut ki bru, ong u wa ki paidbah kmen bha ki deiwa pdiang burom ya ki, tangwa yaka NPP won pdiang ki da ki slipar waka lama yong.
Ong haroh u kamwa ka Party yieñ ko neibynta ka jaitbru wei ka wym jooh pyndem, da chynna wa ha 3-Raliang daw jop u Shemhok Garod ha u snem 2023 neibhah uni bood u yei dieñkjat u (L) Kyrmen Susngi wei u kreh u leh ya boon ki kaam wa sah chrah ha kani ka chnong waka thaaiñ yow wanrah i kylla.
Ha kani ka sngi da pynskhem leh ya kiwa ksohkam ka PDF 3-Raliang Constituency Zonal Zone, wei da pynlait paidbah leh yei sur rwai Election, u Shemhok Garod.
