Pynbna u DC ka East Jaiñtia Hills ya ar tylli ki sngi khang kiad ha waroh kawi ka District

U Deputy Commissioner (Excise), East Jaiñtia Hills District da pynbna paidbah u wa neidaw wa daw em ka Election MDC cha ka JHADC wei yow pyntikna wa man ko kawa lai bait lai ryntih wei kawa khooid neibynta waroh kawi ka District, da pynbna u da ki sngi khang kiad namo ki Dry Day neibynta ki ar sngi.

Kini ki ar sngi toh ha kani ka 21 tarik kawa man ka sngi thap Vote wa ha ka 24 tarik uni hi u bnai kawa man ka sngi niaw Vote.

Kamtæ waroh kiwa dai yonglang (Wholesaler), kiwa dai khutia (IMFL Retailers), ki Bar, ki Canteen, ki pata u man ki kiwa khang ha waroh kawi ka District neibynta kitai ki ar sngi.

Kiwa leh pyrchah daw pynchitom ya ki.