Khliehriat: U Deputy Commissioner, East Jaiñtia Hills District da pyntip paidbah u wa ki bru kiwa lai langær cha Guwahati wa ki thaaiñ khappood waka Assam wow pyndep ya ki kaam yong ki, wow kit ya ki bru cha Airport wa Railway Station namo neibynta kiwon kiwon ki kaam, emkaam wow bood ki ya ki kyndon wa da booh da ka sorkar.
Katkam ki hukum ka sorkar kini ki bru emkaam wow Register ki ha ka Meghalaya Portal neibynta ki e-Pass wei wow yoh ya ka Inter-State Transit Pass na yung krehkaam u Deputy Commissioner, i lai luti toh neibynta i kaam donhi wei ymtoh u lai dei langær.
Ki kari toh kiwa da pynlai da katkam ki kyndon sorkar wei waroh kiwa yah kari toh u chah hikai ki heiyatoh wa ki kyndon wa da booh wei ki Department/Office ye ki leh wow paan yarap naka yung krehkaam District Health and Medical Officer kamjooh leh wow Download wei wow pynemkaam ya ka Aarogya Setu App.
Ymtoh u chong palat 3 ngut hapoh ka kari (4 ngut wa uwa yah kari) ha ki kari 4/5 Seater wei ymtoh u em palat 4 ha ki kari 6/8 Seater. Emkaam wow sap Mask heipor wa lai luti wei wow wai ya ki khiandwar wei emkaam leh wow em ki Hand Sanitizer hapoh ka kari.
Katkam ki kyndon, ki bru wa psiah lyngba ki Screening point emkaam u chah sylli ki da ki IR Thermometer/Thermal Scanner. Emkaam leh wow leh ya ka RTK (Anti Body Testing) ha i thaw psiah (Screening Point) wei daw chah u psiah du hadien wa ki Test man Negative ki namo ym em chah ktah ha u khñiang COVID-19.
Lada jia wa man Positive, emkaam wow chong kset ki (Quarantine) wei daw sylli (Test) won da ka RT- PCR.
U Deputy Commissioner da pyntip u keh wa da khang pyrchah wow lai cha ki Containment Zone.
