Shillong : U Montri Rangbah ka jylla u Dr Mukul Sangma ynne ka sngi da pynbna u ha ka yung dorbar chna aiñ, wa ka sorkar u e poisa ko ya waroh ki khynnah puræ wa hadien wa dep ki ya ka Class X namo ka matric kamjooh ka Post-Graduation wa daw e khusnaam ko ya kiwa wan chong Class tista.
Ha ka jubab ya ka yañia hajrong ka mang tyngka hapoh ka yung dorbar ynne ka sngi, u Dr. Mukul Sangma da ong u “Ha uni u snem ka sorkar u e ko T. 5,000 ya ki khynnah puræ kiwa wan tista cha class, wei toh u yoh ki ya ka chong Class (Attendance) 80% chaneiñ”.
Da ong u wa ini i thmu yong ka sorkar toh wow pynchlur ya ki khynroo khyllood wow wan chong Class ki kamjooh wow kreh chitom ha i puræ puthi yow lait ki u dam u chong Class. Kani leh man ko kam chi bynta wow pyndooh noh yei ieh puræ chiteiñ por ki khynnah.
Kani leh man ko kam chi bynta wow yarap ya ki manyung wa dooh wa duk yow pynduna ya ka yukit ki kam ka bai skur.
Da pteiñ u deiwa ong wa sakhiat wa ka sorkar ha ki por wa rim ym ye ko u kyntu ya ki kaam puræ puthi neibhah wa chem ko ya iwa boon i eh i khoo tangwa da rai ko wow pynkylla noh yeini.
Neibynta u Mukul da pyntip u leh wa ya ka Engineering College ka wa booh booh deilang wa ka Shillong Polytechnic da dep mang poisa ka sorkar deilang wa ka Architecture and Urban Design ha Tura wei daw khut noh wow thap tender wow chna ya kani ka thaw puræ.
Da ong u leh wa ki khynroo khyllood ka jylla ym em kaam de ki wow thooh kreh cha baar jylla hanlada kattæ leh hoi hi u mih u thooh kaam ki chabaar wow pynpliah ki pynda ki ya ki hi.
Da kular u leh wow yarap yei chitom wa chem kiwa sikai hapoh ka jylla wei da e daw u leh wa da boon ware ki kyrdan sikai hapoh jylla iwa da pynkulmar ya ki paidbah nadooh ki sahep ki tnat puræ hadooh ka sorkar bei.
“Ha poh jylla da em boon ki kyrdan kyrdan yong ki wa sikai kam ki deficit, deficit pattern, adhoc, wa kiwi kiwi ” da ong u Dr. Mukul.
Wei yei waroh ini ka sorkar daw pynbait ko waroh yow wanrah yei suk ya kiwa sikai iwa da kulmar katni.
Discussion about this post